Pơma lơ̆m điê̆n thuăi,  Thủ tướng Phạm Minh Chính minh 'măng dơ̆ng thơ thou hơ-iă hăm Singapore hlôi pơgơ̆r keh kong tơdrong pôk rơih. Thủ tướng lui ngeh hăm sơnong jang mă kon pơlei Singapore hlôi pơjao, Thủ tướng Lawrence Wong gô pơtoi pơgơ̆r teh đak Singapore yak hloh rim tơdrong tơnap tap, pơtoi hơtŏk tơ-iung sơđơ̆ng, jơnap.

Pơma đam gah tơdrong tơbôl Việt Nam-Singapore, Thủ tướng Phạm Minh Chính pơtruh nơ̆r, 2 pah hơtŏk kơtang tơdrong jang hadoi gah mŭk drăm, pơih să asong jang đơ̆ng Singapore tơ̆ Việt Nam, mă kăl hloh noh lơ̆m dôm tơdrong jang kơmăi kơmŏk trong pơm jang 'nao, hơmet pơ-'lơ̆ng unh hơyuh, ming man anih jang kăl 'lơ̆ng păng hơtŏk tơring kơdrơ̆m kơjăp sơđơ̆ng; hơtŏk jang hadoi lơ̆m dôm tơdrong jang tĕch unh hơyuh đơ̆ng kial ăn teh đak đe, pơma đam gah pơkăp kơsô̆ carbon, tơplih trong jang jên hu, hơtŏk dơnŏk duk đak dơsĭ, tang găn păng tơjră tơdrong pơm yoch găn lơ teh đak. Ƀar Thủ tướng drơ̆ng nơ̆r gô pơma đam hơdah gah tơdrong jang hadoi 2 pah păng dôm tơdrong jang nai ƀơ̆t Hop akŏm kơpal ASEAN truh ou kơnh tơ̆ Malaysia.