Đơ̆ng rŏng đei mơ̆ng lơ nơ̆r pơma, Thủ tướng Phạm Minh Chính pơma hơdăh Việt Nam ling lang năng kăl tơdrong pơvei jang hơdoi gĭt kăl păng jang hơdoi tôm tơdrong Việt Nam - EU kŭm nhen tơdrong pơvei hăm dôm tĕh đak jang hơdoi; hơnơ̆ng tơgŭm pơm hơtŏk păng hơmet pơ ‘lơ̆ng hlŏh dơ̆ng tơdrong pơvei jang hơdoi gĭt kăl ASEAN – EU.

Thủ tướng athei dôm bơngai tơmât jên jang, anih tĕch mơdro EU hơnơ̆ng yak hơdoi hăm Việt Nam tơlĕch jang 3 tơdrong tơm gĭt kăl, tưk tơ-iung 3 tơdrong pran vă jang tŏk, đei (tơmât jên jang, tĕch mơdro tơ̆ tĕh đak đe, răt yoa tơmam); tơgŭm ăn Việt Nam hơnơ̆ng sơng đei jên tơmât jang păng kơmăy kơmŏk ‘nao, pơyoa ăn tơdrong ‘mĕh vă jang tŏk pran kơjăp lơ̆m rim tơdrong nhen tơplih hăm kơmăy sô̆, kơmăy rơgŏh, jang mŭk drăm hơdoi, atŏk tơ-iung anih jang (đei hloi anih jang hmă păng anih jang hăm kơmăy), tơplih ‘nao rơgei, pơtho pơhrăm khul bơngai jang rơgei, chă đei lơ anih tĕch mơdro, pơm đei tơmam ‘lơ̆ng, pơjing trong tĕch tơmam hiôk ‘lơ̆ng.