‘Nou jĭ tơdrong đei pơma tơbăt tơ̆ Hop akŏm pơtôch bơ̆ jang sơnăm 2024, tơlĕch tơdrong jang sơnăm 2025. Sơnăm 2024, akŏp tơmam drăm lơ̆m dêh char Dak Lăk đei 141.326 ti hlak jên, tŏk hloh 16% pơtêng hăm sơnăm 2023. Tĕch mơdro tơ̆ teh đak đe iŏk đei 1 ti 800 triu USD, tŏk vă jê̆ 24% pơtêng hăm sơnăm sơ̆, iŏk đei hloh trong tơlech jang 15%. Atŭm hăm ‘noh, jang sa iŏk đei jô̆ hơtŏ măt bơngai kơ dêh char đei hloh 72 triu hlak jên lơ̆m 1 ‘nu 1 sơnăm, lơ hloh trong tơlĕch jang ‘noh 68 triu hlak jên lơ̆m 1 ‘nu. Đak Lăk hơnơ̆ng lăng kơjăp lơ̆m bơ̆ jang vei lăng hơrih sa tơpôl. Ŭnh hnam dơnuh tơjur kơtang, đơ̆ng 9% lơ̆m vă đĭ sơnăm 2023 jur pă 6% lơ̆m hơtuch sơnăm ou. Sơnăm 2025, Dak Lăk tơlĕch trong jang tŏk mŭk drăm lơ̆m 8%. Kơdră chĕp pơgơ̆r Hơnih bơ̆ jang vei lăng kon pơlei dêh char Dak Lăk Phạm Ngọc Nghị athei rim tơring atŏk kơtang jơhngơ̆m đon bơ̆ jang tơnăp, tơlĕch đei trong jang hơ iă vă iung jang jơnei trong tơlĕch jang sơnăm 2025, atŏk kơtang, iung jang keh đang rim trong tơlĕch jang kơ Tơdrong tơchơ̆t Hop akŏm tih Hơnih Đảng dêh char Dak Lăk ‘măng mă XVII.