Ƀô̆ trương Anih tơm vei lăng Jên hu Hồ Đức Phớc, Phŏ Kơdră Anih juăt jang kơ Jơnŭm pơgơ̆r 389 kơ teh đak pơgơ̆r Hop akŏm. Tơ̆ Hop akŏm, tơbang hơdăh tơchơ̆t đơ̆ng Jơnŭm pơgơ̆r 389 kơ teh đak, Kơdră Anih Juăt jang kơ Jơnŭm pơgơ̆r 389 kơ teh đak Lê Thanh Hải ră hơdăh, xơnăm 2022, khul jang kơpal găh tơdrong jang âu lơ̆m jâ̆p teh đak hlôi ƀôh băt, rôp vei, xek tơlang jê̆ 140 rơbâu 'măng pơm glăi, tŏk 1,17% pơtêng hăm khei năr âu xơnăm 2021. Vă pơm jang đei jơnei tơdrong jang tơjră tĕch pơdro tơtông, pơgâ̆m pơjĭp păng tơmam drăm yăh xơnăm 2023, Jơnŭm pơgơ̆r 389 kơ teh đak pơkăl Jơnŭm pơgơ̆r 389 kơ rim anih jang, rim dêh char, pơlei tơm lơ̆m trung ương kơchăng băt hơdăh, tơroi trŏ tơdrong đei ƀôh; xơkơ̆t tơring teh, tơdrong tơm, tơmam drăm, tơdrong jang hơdăh; băt hơdăh trong pơm jang, tơlĕch dôm trong jang trŏ ƀlep vă tơjră, tang găn đei jơnei dôm tơdrong tĕch pơdro tơtông, pơgâ̆m pơjĭp păng tơmam drăm yăh lơ̆m tơdrong jang po, tơring po pơgơ̆r jang, vei hơlen.