Kiơ̆ nơ̆r tơroi lơ̆m jơ bơ̆ jang, đơ̆ng sơnăm 2020 - 2022, dêh char Dak Lak mong akŏm đei 986 ti 632 triu hlak jên ăn tơdrong jang tang găn jĭ covid 19. Dêh char chă mong akŏm, sơng iŏk đơ̆ng dôm khul grŭp, rim bơngai lơ̆m păng ‘ngoăih kơ tĕh đak đei 71 ti 355 triu hlak jên. Đơ̆ng kơ sô̆ jên âu, dôm anih jang, khul grŭp kơchăng tơlĕch trong răt tơmam, kơmăy kơmŏk, pơgang vă pơm lăp ăn tơdrong tang găn jĭ Covid -19 tơ̆ tơring. 

Anih jang pơgang dêh char Dak Lak kŭm tơrĕk truh tơdrong pơtho ăn kăn ƀô̆ jang pơgang tơ̆ tơring păng khul jang pơgang tang găn tơdrong jĭ. Kiơ̆ đơ̆ng nŏh pơm hơtŏk jơhngâm dăr lăng tơdrong jĭ, chă ƀôh hrôih, tang găn, hơmet tơtom dôm tơdrong jĭ.

Ƀok Dương Thanh Bình, Kơdră Anih vei lăng tơdrong hơpơi ‘mĕh – Anih chĕp kơ̆l pơgơ̆r kơ Kuô̆k hô̆i tơtă athei hơlen năng dơ̆ng tơdrong hơnhăk 1,2 hnam pơgang ăn tơring vei lăng; pơm hơdăh hơnăp jang đơ̆ng Hnam pơgang xăh, phương hăm tơdrong khăm hơmet jĭ hăm ƀao hiêm; hơtŏk tơdrong ‘lơ̆ng mưh khăm hơmet jĭ tơ̆ hnam pơgang apŭng vă găn ƀiơ̆ bơngai jĭ năm hơmet tơ̆ hnam pơgang kơpal; tơrĕk truh tơdrong tơ lĕch jên jang ăn dôm hnam pơgang, khul jang pơgang tơ̆ tơring lơ̆m dêh char.