Vang năm pơlong đei 97 kơ loăi chehphe Robusta păng 49 kơ loăi chehphe Arabica, đơ̆ng rim tơring pơtăm chehphe đe ư hơnhang nhen Đắk Lắk, Lâm Đồng, Gia Lai, Đắk Nông, KonTum, Quảng Trị păng Sơn La… ‘Nou dôm kơ loăi chehphe ‘lơ̆ng đei rơih tôch hơlen, tơbăt hơdăh jơhngơ̆m đon kơrŭn đĭ ai kơ bơngai pơtăm păng hơnih vang năm pơlong lơ̆m teh đak.Lơ̆m jơ ‘năr đơ̆ng năr 20 truh năr 23/4, Khul dăr lăng gô iung jang lăng hơlen, châm điêm rim kơ loăi chephe. Tơdrong hơlen, châm điêm gô pơm kiơ̆ trong pơkăp kơtang apung plĕnh teh, đơ̆ng mã tơmam drăm, hơlen lăng groi teh, hơdrĕng ot truh hơmet pơ ‘lơ̆ng.