Lêh tơklăh, ba trong khul jang tơgŭm đơ̆ng Khul linh kon pơlei Việt Nam vih dơ̆ng tơ̆ tĕh đak đei pơgơ̆r tơ̆ cham gre păr Hatay tơ̆ Antakya, tơring kơdrâm kơ dêh char Hatay, Thổ Nhĩ Kỳ. Pơma tơ̆ jơ pơm lêh, Bơngai tang măt Đỗ Sơn Hải pơma hơdăh tơdrong Khul linh kon pơlei Việt Nam ăn khul năm jang dŏng tơgŭm tơ̆ Thổ Nhĩ Kỳ dôm năr âu ki ‘nŏh jĭ tơdrong ‘lơ̆ng vang pơm hơtŏk tơdrong pơvei 2 pang đơ̆ng 2 tĕh đak.

Ƀar Khul jang tơgŭm đơ̆ng Khul linh kon pơlei Việt Nam păng Công an Việt Nam hlôi hơmet pơ ‘lơ̆ng lơ tơdrong pơmat tat, ưh hli tơdrong krê hơmơt, adrin tơgŭm ăn kon pơlei Thổ Nhĩ Kỳ hơmet ming tơdrong hiong răm đơ̆ng tĕh dơdrŏ, đei kon pơlei, khul kơdră pơ gơ̆r tơring păng dôm khul jang dŏng tơgŭm nai lơ̆m apŭng plenh tĕh lui, tơchĕng ‘lơ̆ng. Lơ̆m dôm năr bơ̆ jang đơ̆ng ‘năr 13 - 22/2 tơ̆ dêh char Hatay, khul jang đơ̆ng Khul linh kon pơlei Việt Nam pơgơ̆r tơchă tơ̆ 31 anih, chă ƀôh 15 anih đei bơngai lơ̆m hnam păk kơtĭt, lơ̆m nŏh đei 2 anih ƀôh đei tơdrong arih. Đơ̆ng rŏng kơ ‘nŏh, khul pơjao ăn anih jang tơgŭm tơ̆ tơring iŏk yoa kơmăy kơmŏk tih kôch chă păng iŏk tơlĕch đei 28 hơkâu bơ ngai lôch. Kơsơ̆ 23/2, khul vih truh tơ̆ Nội Bài, Hà Nội.