Vang năm akŏm lêh tơbăt đei ƀok Nguyễn Trọng Nghĩa, Kơdră Anih jang Tuyên yăo păng Pơrô̆ pơrôp Trung ương; yă Võ Thị Ánh Xuân, Phŏ Kơdră teh đak bơ̆n atŭm hăm đe kơdră kơpal kơ dôm anih jang tơm, anih jang Trung ương. Pơma ah jơ lêh, ƀok Nguyễn Trọng Nghĩa pơgơ̆r dêh char Bình Định păng dôm dêh char lơ̆m Tơring 5 pơtoi hơtŏk jang hadoi, tơguăt kơjăp hloh dơ̆ng; pơm jang tơnăp tơdrong jang "Ƀlŏk bơnê", "Nhă đak ƀlŏk kơ tu", pơgơ̆r năm hơpong ngôi, pôk bơnê hăm dôm unh hnam mă teh đak tơchơ̆t tơgŭm, 'nhŏng oh đe kang ƀô̆, khul linh, kon pơlei păng hŏk tro năm pơm linh tơ̆ tơring Tu.

Atŭm hăm noh athei hơtŏk kơtang tơdrong tơroi tơbăt gah tơdrong kăp gĭt kơ jơhnơr hơrih ou lơ̆m tôm anih jang Đảng, tôm khul linh, tôm kon pơlei, mă kăl noh hăm đe sơnăm mơlôh, sơkơ̆t tơdrong pơgơ̆r trŏ ƀlep đơ̆ng Đảng, Kơdră Hồ Chí Minh păng tơdrong plang tih tên đơ̆ng đe yă ƀok mih ma yak hơdrol. Dôm ƀai hŏk đơ̆ng tơdrong 'nhăk bơngai năm pơm linh tơ̆ tơring Tu athei tơguăt hăm tơdrong pơhrăm bơngai jang kăch mang chăl đơ̆ng rŏng athei pơtrŏ hăm tơdrong tơplih 'nao păng hơtŏk tơ-iung.