Tơ̆ Hop akŏm, bơngai jang lơ̆m Anih tơm Chĭn trĭ, Kơdră Anih jang tơdrong jang kơ teh đak tơ̆ Trung ương Phan Đình Trạc pôk bơnê kơ dôm tơdrong đei jơnei mă Cao Bằng hlôi jang đei lơ̆m pơm kiơ̆ Tơchơ̆t Trung ương 8 (jăl 11) lơ̆m khei năr âu ki; atŭm hăm noh pơkăl Cao Bằng pơtoi băt hơdăh, hơtŏk xơnong jang, pơjing tơdrong drơ̆ng minh lơ̆m tơdrong hlôh vao păng pơm jang đơ̆ng đe kang ƀô̆, đảng viên, bơngai jang, kon pơlei, kang ƀô̆ linh găh pơm kiơ̆ pơkăp vei lăng Teh đak lơ̆m pơkăp jang ‘nao. Ƀok Phan Đình Trạc ră hơdăh: Xơkơ̆t hơdăh vei lăng Teh đak jing xơnong jang dơnơm, tơdrong jang hơnơ̆ng  kơ tôm Đảng, tôm kon pơlei păng tôm khul linh, Cao Bằng kăl jang hadoi kơjăp lơ̆m hơtŏk mŭk drăm – tơpôl, jang tơbôl hăm vei xơđơ̆ng tơpôl lơ̆m teh đak.