Lơ̆m kơthơ, Tổng Bí thư, Kơdră chĕp pơgơ̆r teh đak Lào Thongloun Sisoulith pơma hơdăh, tơdrong ƀok Võ Văn Thưởng đei pôk tơmơ̆t pơm Kơdră chĕp pơgơ̆r teh đak tơƀôh hơdăh tơdrong lui kiơ̆ kơjăp đơ̆ng Đảng, Teh đak păng Kon pơlei Việt Nam hăm ƀok; sơkơ̆t hơdăh gô hơnơ̆ng jang hơdoi vă tơgop hơmet pơ ‘lơ̆ng tơgoăt tơgoăl gĭt kăl, jang hơdoi tôm tong, ‘nhŏng oh dih băl ƀar păh Đảng, ƀar teh đak păngKon pơlei kơ ƀar teh đak. 

Nơ̆r pơtruh đơ̆ng Kơdră chĕp pơgơ̆r Teh đak Cộng hòa Nhân dân Trung Hoa Tập Cận Bình pơma hơdăh Trung Quốc păng Việt Nam ‘nŏh teh đak tơjê̆ tơgoăt tơgoăl xã hội chủ nghĩa. Kơdră chĕp pơgơ̆r Teh đak Tập Cận Bình pơbăt jơhngơ̆m hơ iă tơdrong tơgoăt tơgoăl Trung - Việt, hơdrin đĭ jơhngơ̆m atŭm hăm Kơdră chĕp pơgơ̆r teh đak Võ Văn Thưởng pơtrŭt kơtang tơgoăt tơgpoăl ƀar teh đak hơnơng atŏk tơ iung sơđơ̆ng, ‘lơ̆ng hơ iă.