Tơ̆ jơ pơm lêh, tang măt ăn Kơdră chĕp pơgơ̆r Đảng păng Teh đak, Kơdră chĕp pơgơ̆r teh đak Lương Cường hlôi pôk ăn Huy hiệu 40 sơnăm jang Đảng păng hmach chơt hơ iă ăn Kơdră chĕp pơgơ̆r Hơnih bơ̆ jang ăn Kơdră chĕp pơgơ̆r Teh đak Lê Khánh Hải. Čhưu jơhngơ̆m păng hưch hanh đei sơng iŏk Huy hiệu 40 sơnăm jang Đảng, Kơdră chĕp pơgơ̆r Hơnih bơ̆ jang ăn Kơdră chĕp pơgơ̆r teh đak Lê Khánh Hải pơma tơbăt jơhngơ̆m đon bơnê kơtang kơ khul kơdră chĕp pơgơ̆r Đảng, Teh đak, Khul kơdră chĕp pơgơ̆r rim hơnih bơ̆ jang Đảng Trung ương, Khul kơdră chĕp pơgơ̆r Đảng Hơnih bơ̆ jang ăn Kơdră chĕp pơgơ̆r Teh đak atŭm hăm rim kơdră vang năm, hơlêm păng pơgơ̆r pơm lêh gĭt kăl ou. Ƀok Lê Khánh Hải sơkơ̆t hơdăh gô atŭm hăm Hơnih bơ̆ jang ăn Kơdră chĕp pơgơ̆r Teh đak hơnơ̆ng tơgoăt pôm nơ̆r ƀơ̆r đon, vang kơrŭn jơhngơ̆m yak hloh tơnap tap, hơdrin jang keh đang ‘lơ̆ng tơdrong jang chinh trĭ kơ hơnih bơ̆ jang, tơ iung pơjing Đang ƀô̆ roi năr roi rơgoh ‘lơ̆ng pran kơtang, tơgop kơtang lơ̆m tơdrong jang tơ iung pơjing păng vei lăng teh đak lơ̆m chăl hle, chăl atŏk tơ iung pơdrŏng kơtang, hơnŭk hơnoa, gơh hơgei oei sa ‘lơ̆ng.