Khul mơdro sa hơdoi Hoa Kỳ - APEC ‘noh mĭnh trong tơchăr đei tơlĕch jang đơ̆ng Hơnih jang kmăi kmŏk đei hơnih bơ̆ jang tơ̆ Hoa Kỳ păng hlôi vang iung jang hơdoi lơ sơnăm lơ̆m APEC. Tang măt ăn rim hơnih mơdro sa Hoa Kỳ hăm lơ tơdrong jang phara dih băl păng găh lơ jei đei tơdrong vă jang tơmơ̆t jên jang tơ̆ Việt Nam. Kơdră chĕp pơgơ̆r Teh đak hơlen tơdrong jang hơdoi ƀar păh Việt Nam hăm Hoa Kỳ ling lang pơih să păng atŏk tơ iung kơtang lơ̆m vă jê̆ 30 sơnăm mơdro sa dih băl hiôk hian păng hloh 1 sơnăm pơm hơtŏk tơgoăt tơgoăl jang Jang hơdoi gĭt kăl tôm tong. Kơdră chĕp pơgơ̆r Teh đak sơkơ̆t hơdăh, Việt Nam tŏk bŏk hơnơ̆ng pơm pơkeh ‘lơ̆ng trong jang tơmơ̆t jên jang mơdro sa kiơ̆ trong hơdăh, tơpăt, sơđơ̆ng, trŏ lăp hăm dôm tơdrong joăt apŭng plĕnh teh vă hơvơn tơmơ̆t jên jang. Lơ̆m khei ‘năr tơplih mŭk drăm lơ̆m plei teh, Kơdră chĕp pơgơ̆r Teh đak tơbăt, Việt Nam ‘meh vă jang hgơdoi kơjăp hăm rim hơnih mơdro sa Hoa Kỳ păng tơring APEC lơ̆m rim tơdrong jang kmăi kmŏk hơgei păng tơplih ‘nao tơchăr; ŭnh hơyuh rơgoh ‘lơ̆ng păng atŏk tơ iung rơgoh ‘lơ̆ng.