Tang măt Anih chĕp kơ̆l pơgơ̆r Quốc hội, Kơdră Quốc hội Trần Thanh Mẫn tơƀôh jơhngơ̆m đon ƀlŏk hơdơ̆r gĭt kăl hăm rim jơhnơr thây kô pơtho, kang ƀô̆ vei lăng pơtho pơhrăm pơma atŭm, dôm bơngai tang măt Quốc hội dang ei tŏk bŏk bơ̆jang lơ̆m anih jang pơtho pơhrăm pơma hơdrô̆ iŏk đei lơ jơnei ‘nao lơ̆m tơdrong jang pơtho hŏk; hmach thơ thâu ăn tơdrong jang pơtho pơhrăm kơ teh đak bơ̆n roi ‘năr roi hơtŏk tơiung.

Kơdră Quốc hội Quốc Trần Thanh Mẫn pơma hơdăh, hăm tơdrong hơdrin, hưch hanh tơdrong jang păng hlôh vao yan âu gĭt kăl, dôm bơngai tang măt Quốc hội ‘noh jĭ thây kô, chih hơmet pơ ‘lơ̆ng tơdrong jang khôi luơ̆t, vang jang tơchơ̆t dôm tơdrong gĭt kăl, dăr lăng pơgơ̆r bơ̆jang kiơ̆ tơdrong jang tơgŭm, khôi luơ̆t găh pơtho pơhrăm. Kơdră Quốc hội ‘meh vă rim thây kô pơtho gô ling lang jing bơngai đei jơhngơ̆m đon ‘lơ̆ng, pơma sa ‘lơ̆ng hơiă; hơdrin hơmet pơ ‘lơ̆ng rim tơdrong mơmat tat, đĭ jơhngơ̆m, jang tơnăp, mơ nơh kơ jang, ‘mêm kơ hŏk tro, ưh kơ pơdơh hơdrin hơtŏk ‘lơ̆ng tơdrong joăt jang.