Hơtaih đơ̆ng anih tơm kơ apŭng Kbang 80 km, xah Kon Pne nhen minh achon teh tơklah hơdrô̆ lơ̆m tơring groi kông să seng. Tơ̆ âu, jê̆  tôm noh kon pơlei Bahnar hăm tơdrong hơrih oei ƀơm lơ kơƀah kơƀôch.

Tơ̆ tơring hơtaih yaih âu, đei lơ bơngai pơtho adoi oei tơguăt hăm đe hŏk tro. Thâi Nguyễn Anh Tuấn – Kơdră Hnam trưng Phôh thŏng Kon kông hŏk oei hadoi Jăl kơđeh păng jăl Trung hŏk kơ sơh Kon Pne ăn tơbăt: “Dang ei hnam trưng tŏk bŏk đei pơkăp 21 ƀiên chê̆, mă lei hnam trưng hơdrô̆ đei 17 ‘nu đĕch, kơƀah truh 4 bơngai pơtho. Kơdih inh noh kơdră hnam trưng mă lei tơ̆ hơnăp adoi oei năm pơtho ăn đe oh gah môn toăn”

Tơnap tap đei ƀôh đơ̆ng hơtuch sơnăm 2021, Kon Pne pă đei sơkơ̆t jĭ tơring tơnap tap bơih. Tơdrong mă âu vă nhen hăm dôm tơdrong tơgŭm ăn bơngai pơtho ƀơm kăt tơjur. Duch pơtho Lê Thị Xuân Hồng, pơtho Mi thuơ̆t truh pơm jang tơ̆ hnam trưng trŏ ah khei năr mă dôm tơdrong tơgŭm pă đei oei. Duch athei jang lơ tơdrong jang vă hơmet ăn tơdrong ưh kơ mah bơngai pơtho: “Rim sơnăm inh hơnơ̆ng jang hloi tơdrong pơm bơngai pơtho chu nhiê̆m, chu nhiê̆m đơ̆ng lăm 6 dang ei tŏk lăm 8 păng gô chu nhiê̆m truh đĭ jăl hŏk kơ đe oh hloi. ‘Nguaih kơ noh, môn Mi Thuơ̆t tŏ sĕt jơ noh hnam trưng athei inh pơtho thim dôm môn nai nhen pơtho gah tơdrong pơtơm pơm jang, pơtho gah yăo yŭk kŏng yân tôm jơ, kơlih ưh kơ mah bơngai pơtho”.

Hăm duch pơtho Đinh Thị Lất, tôm 10 sơnăm tơguăt hăm Hnam trưng Phôh thŏng Kon kông hŏk oei hadoi Jăl kơđeh păng jăl Trung hŏk kơ sơh Kon Pne. Băt tôm tơdrong tơnap tap hrat hrĭn, duch adoi tơchĕng ah mă tơring hơtaih yaih âu ưh kơ ê pă đei iŏk tơdrong tơgŭm hăm tơring tơnap tap: “Hnam hơtaih đơ̆ng hnam trưng 100 km, vih vơ̆t hăm gre honđa phơ phŏ ‘mi kial noh tơnap tơpă. Kơlih tơdrong jang noh inh adoi năm vă chă tơgop jơhngơ̆m. Ưh kơ mah bơngai pơtho, ưh đei bơngai pơtho môn phŭ noh athei iŏk pơtho tôm hloi dôm môn phŭ noh adoi hrat mơ̆n. Dang ei tŏk ah pơkăp tơring 1, noh tơdrong xa yua jur kơđeh, pơm ăn tơdrong hơrih tơnap tap hloh. Hơpơi ‘meh gô đei trong pơkăp chă tơgŭm mă trŏ hloh vă bơngai pơtho pơm jang tơ̆ âu đunh sơnăm păng ‘mêm kơ tơdrong jang păng sơđơ̆ng jơhngơ̆m pơm jang"

Xah Kon Pne, apŭng Kbang, dêh char Gia Lai tŏk bŏk oei ưh kơ mah truh 10 bơngai pơtho, pơjing tơdrong hrat hloh hăm khul bơngai pơtho dang ei. Ƀok Dương Quốc Điệp – Kơdră Anih jang vei lăng kon pơlei xah Kon Pne tơroi, đơ̆ng mă xah pă đei oei lơ̆m hơnăn xah tơnap tap hloh ah jăl sơnăm đơ̆ng 2021 – 2025 kiơ̆ Tơchơ̆t 861/QĐ-TTg đơ̆ng Thủ tướng teh đak, hlôi đei lơ kang ƀô̆, bơngai jang apinh năm jang tơdrong jang nai dah mă pơdơh pơm jang, kơlih tơdrong jang tơnap tap dêh mă ưh đei iŏk tơdrong tơgŭm: “Đơ̆ng rŏng kơ đei Tơchơ̆t 861 đơ̆ng noh truh dang ei đei 24 ‘nu bơngai jang kơpal, bơngai pơtho apinh tơplih tơdrong jang nai dah mă pơdơh kơ jang. Mă kăl noh ƀar hnam trưng hŏk dang ei tŏk bŏk ưh kơ mah bơngai pơtho. Adoi hơpơi ‘meh dôm jăl jang kơpal chă hơlen năng, tơtom dah đei trong pơkăp jang kăp gĭt, tơgŭm ăn rim anih jang gơh đei tôm bơngai pơtho vă akŏm ăn tơdrong jang pơtho pơhrăm ăn kon pơlei lơ̆m tơring”.

Hơpơi ‘meh tơring ah hơnê̆ bri kông Kon Pne, tơdrong plang ưh đei mơmơnh vă minh nơ̆r đơ̆ng rim bơngai pơtho kăl đei ƀlŏk băt mă tơgăl, ưh hơdrô̆ đei tơdrong tơgŭm gah tơmam drăm mă oei kăl tơdrong tơrĕk hơlêm gah đon bơnôh, jang hadoi đơ̆ng jơnŭm jang tơpôl păng rim jăl pơgơ̆r tơring.