Lơ̆m iung pơma đơ̆ng kơdih, Thủ tướng Phạm Minh Chính pơma hơdăh dơ̆ng trong jang kơjăp, ‘lơ̆ng găh hơtŏk tơiung kơjăp păng nơ̆r pơkăp đơ̆ng Việt Nam ‘noh jĭ ưh kơ hŭt lê̆ tơdrong oei sa sơđơ̆ng, hơgei, hơtŏ băl lơ̆m tơpôl păng vei lăng cham char vă druh kiơ̆ mŭk drăm tŏk hơdrô̆.

Thủ tướng pơma hơdăh, rim tơdrong bơjang đơ̆ng bơ̆n hrei ‘nâu tă kơ gô tơchơ̆t hơnăp jang đơ̆ng rim jơhnơr tơ̆ hơnăp kơnh ngăl. Hăm tơdrong jang ‘noh, Việt Nam pơkăp gô hơdrin đĭ jơhngơ̆m kŭm hăm dôm teh đak, tơpôl apŭng plĕnh teh pơkăp hơdrin bơ̆jang kiơ̆ tơdrong hơgăt ưh kơ tơlĕch kơchơ̆t ‘mê̆ ‘mach hơdrol kơ sơnăm 2050, tơgop ăn tơdrong hơtŏk tơiung kơ 1 apŭng plĕnh teh, ‘yâu, rơgoh, ‘lơ̆ng, kơjăp, yua kơ khei ‘năr tơ̆ hơnăp kơnh kơ rim jơhnơr ning nai kơnh.