Kơ sơ̆ ‘năr 7/3, tơ̆ Hnam Kuôk hô̆i, Kơdră Kuôk hô̆i Vương Đình Huệ sơng bơngai tang măt ăn Grŭp dôm Khŭl jang mŭk drăm Nhật Bản (Keidanren) tŏk bŏk năm ngôi, bơ̆jang tơ̆ Việt Nam păng vang truh Hop akŏm mŭk drăm gĭt kăl Việt Nam - Nhật Bản ƀlep ƀơ̆t tơbăt 50 sơnăm pơjing jang tơbôl Việt Nam - Nhật Bản (21/9/1973-21/9/2023).  Pơma tơ̆ jơ sơng, Kơdră Kuôk hô̆i Vương Đình Huệ tơbăt, tơ̆ hơnăp kơnh, Kuôk hô̆i Việt Nam gô pơdrơ̆ng kiơ̆ 1,2 luơ̆t tôch kơ gĭt kăl, nhen Luơ̆t teh ( hơmet ming), Luơ̆t tĕch mơdro teh, hnam ( hơmet ming), Luơ̆t hơmet ming, tơmơ̆t dơ̆ng 1,2 hơpăng đơ̆ng Luơ̆t Dôm anih jang asong tŏk iŏk jên, Luơ̆t Hơtŏk tơiung kơmăy kơmŏk.

Kơdră Kuôk hô̆i athei, Keidanren kŭm hăm dôm anih mơdro sa Nhật Bản bơngơ̆t truh păng tơgop nơ̆r vă Kuôk hô̆i Việt Nam chih pơkeh Luơ̆t gĭt kăl âu. Tang măt Keidanren pơkă gô hơdai hăm dôm anih mơdro sa Nhật Bản hơdrin đĭ jơhngơ̆m tơgop ăn tơdrong hơtŏk tơiung kơ pơ đĭ hloi Việt Nam păng Nhật Bản tơ̆ hơnăp kơnh, tơgop gĭt kăl kŭm hăm Khŭl kơdră teh đak Việt Nam bơ̆jang kiơ̆ dôm tơdrong hơgăt hlôi tơlĕch ăn.