Tơ̆ jơ tơjrâ̆m, Kơdră Kuôk hô̆i Vương Đình Huệ ră hơdăh, 40 xơnăm kơ âu, Jơnŭm jang găh đe Drăkăn Anih tơm Kŏng ang hơnơ̆ng hơtŏk tơ-iung găh rim tơdrong, đơ̆ng pơgơ̆r pơm jang truh kơsô̆ bơngai jang păng tơdrong rơgei 'lơ̆ng păng hơtŏk tơ-iung lơ̆m dôm tơdrong jang kơ đe drăkăn. Jơnŭm jang jing anih vă rim bơngai jang pơhrăm dơh po, xơkơ̆t dơh po, jing tơdrong tơm vă đe pơmai oh kơ-'nôh hloh lơ̆m tơdrong plang, păng hơnơ̆ng hơtŏk hăm dôm tơdrong jang tơnăp lơ̆m tơpôl, mă oei răk 'măn um ai 'lơ̆ng kơ bơngai drăkăn Kŏng ang kon pơlei nhen: Tơdrong jang “Pêng tơnăp”, Tơdrong jang “Drăkăn Kŏng ang rơgei tơdrong jang teh đak, tơnăp tơdrong jang hnam"... Đơ̆ng dôm tơdrong jang noh, đei lơ um ai đe drăkăn Kŏng ang nuih mơng, lơ pơmai oh jing bơngai jang khua hŏk rơgei, đei kŭp yom lơ̆m anih jang păng lơ̆m tơpôl; kơsô̆ kang ƀô̆ drăkăn đei pôk jang kơchư̆k kơpal roi năr roi lơ. Kơdră Kuôk hô̆i akhan, hăm tơdrong pơkăl hơtŏk tơ-iung 'nao kơ teh đak, Đảng, Teh đak bơ̆n roi năr roi tơrĕk tơgŭm ăn đe drăkăn, kơyuơ pơkăp hơtŏ hơnơ̆ng, jơnap păng gơh rơgei hăm drŏnglo drăkăn. Kơdră Kuôk hô̆i pơkăl, kang ƀô̆ drăkăn Kŏng ang kon pơlei adrin pơhrăm, hơbĕch, hơbal lơ̆m tơdrong hơmet tơnap tap lơ̆m tơdrong jang, hơmet dôm tơnap tap kơyuơ tơdrong pơkăp hơtŏ hơnơ̆ng drŏnglo drăkăn.