Đơ̆ng rŏng kơ lêh sơng, Kơdră teh đak bơ̆n Lương Cường atŭm hăm ƀok Kơdră Gabriel Boric Font hlôi chĕp kơ̆l khul kơpal tang măt kơ 2 teh đak akŏm pơma đam vă pơđăp gah dôm trong pơm hơtŏk kơjăp hloh dơ̆ng tơdrong jang tơbôl tôm tơdrong kơ 2 teh đak. Ƀar pah hlôi hơlen Tơchơ̆t atŭm vă kơhret hloh dơ̆ng tơdrong jang tơbôl tôm tơdrong Việt Nam – Chile.

Ƀar pah adoi kĭ pơkăp minh ƀar hla bar tơchơ̆t jang hadoi lơ̆m tơdrong tĕch răt tơmam drăm, choh jang xa, vei sơđơ̆ng tơpôl, jang hadoi kơ dôm tơring păng minh ƀar tơdrong jang kăp gĭt nai vă pơm trong hơtŏk tơ-iung pran hloh dơ̆ng lơ̆m tơpôl jang tôm tơdrong kơ  teh đak; atŭm hăm noh drơ̆ng nơ̆r gah tơdrong pơtoi hơtŏk pơih să jang hadoi păng tơroi dih băl tơdrong hlôh vao lơ̆m chă tơgŭm dih băl nhen vei lăng rơgoh cham char, tơjră hăm tŏ 'mi kial tơplih, hơtŏk jang jơk 'lơ̆ng kơjăp, pơm tơlĕch tơmam drăm choh pơtăm, sir kôch tơmo kăp gĭt, tơplih trong jang 'nao hơgei.