Ƀlep ƀơ̆t tơbăt 34 sơnăm năr đĭ đăng kon pơlei vei lăng sơ đơ̆ng tơring sơlam, 64 sơnăm năr joăt joe ƀô̆ đô̆i vei lăng tơring sơlam Việt Nam păng 60 sơnăm năr joăt joe Học viện khŭl linh vei lăng tơring sơlam, pơ gê ‘năr 28/2, Kơdră teh đak kơplăh dang ei yă Võ Thị Ánh Xuân năm ngôi păng bơ̆ jang tơ̆ Học viện Khŭl linh vei lăng tơring sơlam - anih pơtho pơhrăm kang ƀô̆ păng tơchĕng hơlen khoa hŏk đơ̆ng khŭl linh Ƀô̆ đô̆i vei lăng tơring sơlam tơ̆ Thị xã Sơn Tây, Hà Nội.  

Pơ ma tơ̆ jơ bơ̆jang, Kơdră teh đak kơplăh dang ei yă Võ Thị Ánh Xuân pơma hơdăh, hăm tơdrong chĕp kơ̆l đơ̆ng Quân ủy Trung ương, Anih tơm vei lăng khŭl linh teh đak mă kơtă ‘noh jĭ đơ̆ng Anih tơm pơgơ̆r Ƀô̆ đô̆i vei lăng tơring sơlam, Học viện Khŭl linh vei lăng tơring sơlam hlôi hơdrin pơ jing anih jang pran kơjăp tôm tong, bơ̆ jang kiơ̆ ‘lơ̆ng 2 tơdrong jang jing anih pơtho pơhrăm tơchĕng hơlen khoa hŏk hai păng chĕp kơ̆l pơgơ̆r ling lang iung tơblăh đơ̆ng Anih tơm pơgơ̆r khŭl linh vei lăng sơđơ̆ng hai. Khei ‘năr hrei ‘nâu tŏk bŏk tơlĕch ăn ‘meh vă, hơnăp jang roi lơ hăm Ƀô̆ đô̆i vei lăng tơring sơlam pơma atŭm păng Học viện Khŭl linh vei lăng tơring sơlam pơma hơdrô̆ lơ̆m tơdrong jang pơjing, vei lăng tơdrong pơm tơm vei sơđơ̆ng tơring sơlam lơ̆m tơdrong ‘nao.