

Đơ̆ng năr ou (1/7), Lâm Đồng, Bình Thuận păng Dak Nông hlôi hơgrop tơpă, pơjing đei dêh char Lâm Đồng ‘nao, hăm groi teh să hloh lơ̆m teh đak, măt kon pơlei đei lơ hloh kơ Nam Trung bộ păng Tây Nguyên. Tơ̆ Dak Nông, kon pơlei hơmŏ kơtang đơ̆ng rŏng hơgrop gô pơjing đei hơyak pran kơtang hloh ăn tơring atŏk tơ iung mŭk drăm-tơpôl, mă kăl ‘noh tơmang pơhiơ̆ mưh tơgĕch dôm tơdrong rơvơn kơ tơring hlôi đei rơvơn kơtang kơ tơmang pơhiơ̆.
‘Nhŏng Nguyễn Anh Quốc, oei tơ̆ thĭ trân Ea T’ling, apŭng Cư Jút, dêh char Dak Nông (so) tơbăt, đơ̆ng rŏng pơjing, sơnăm 2004, dêh char hlôi atŏk tơ iung tôch tĕnh koăng, tơdrong hơrih sa kơ kon pơlei đei hơmet pơ ‘lơ̆ng hơdăh. ‘Nhŏng Quốc hơmŏ, mưh hơgrop hăm ƀar dêh char đei rơvơn kơtang găh tơdrong jang tơmang pơhiơ̆ ‘noh Lâm Đồng hăm Bình Thuận, Dak Nông gô pơjing đei dơ̆ng hơyak pran, jang kiơ̆ ‘lơ̆ng dôm tơdrong đei. Găh kră pơlei Điểu Nơi, bơngai M’Nông, oei lơ̆m pơlei Diêng Ngaih, tơring Dak R’tih, apŭng Tuy Đức so hơmŏ, hơgrop 3 dêh char gô pơjing hơyak pran kơtang atŏk tơ iung ăn tơring. Dêh char ‘nao gô đei tơdrong jang mŭk drăm tih tên hloh păng gô lăng ba tơmơ̆t jên jang lơ hloh dơ̆ng ăn tơring hơtăih yăih nhen pơlei Diêng Ngaih: “Hơgrop bơih ‘noh kon pơlei M’nông oei tơ̆ Dak Rtih oei pơnam jang sa, mĭnh nơ̆r ƀơ̆r đon kiơ̆ Đảng, Teh đak. Bơngai M’nông hơpơi ‘meh vă lăp đơ̆ng rŏng hơgrop gô atŏk tơ iung ‘lơ̆ng hơ iă hloh dơ̆ng ăn tơring kon kông, kơdră chĕp pơgơ̆r dêh char ‘nao gô lăng ba tơmơ̆t jên jang lơ hloh dơ̆ng ăn tơring kon kông lơ̆m ou đei kon pơlei oei tơ̆ Dak Rtih. Trong glung rĕnh gô đei ming man vă kon pơlei chă yơ yak rơvơn, tĕch mơdro dih băl ‘lơ̆ng hơ iă.”
Viết bình luận