Tơdrong proh hơmet âu kiơ̆ lơ̆m dôm tơdrong tơm nhen hơnih tơtil băl, lei lăi băl găh tơdrong joăt oei sa, bônh hiôk găh trong nơnăm, vei sơđơ̆ng teh đak păng hơtŏk tơiung mŭk drăm - tơpôl. Tơ̆ apŭng Chư Prông, đei 18 anih bơ̆jang, đơ̆ng rŏng kơ tơmơ̆t hơdai lăp oei pă 6 xăh; lơ̆m noh xăh Ia Pia đei pơjing kiơ̆ lơ̆m tơdrong proh hơmet đơ̆ng 3 xăh Ia Pia, xăh Ia Ga păng Ia Vê.

Ƀok Siu Khlo, Bí thư Đảng xăh Ia Vê, apŭng Chư Prông roi tơbăt, gơnang đơ̆ng jang ‘lơ̆ng tơdrong jang tơroi tơbăt kơna kon pơlei băt tôm tơdrong tơroi găh trong jang tơmơ̆t hơdai đơ̆ng dêh char truh tơ̆ xăh păng tơplih jing tơdrong khŭl kơdră chĕp kơ̆l 2 tăl: “Ƀơ̆t ĭnh mơ̆t tơ̆ dôm pơlei pơla, tơƀơ̆p kon pơlei kŭm đei băt jơhngơ̆m đon tơchĕng đơ̆ng đe sư găh tơdrong tơmơ̆t hơdai dôm anih jang teh đak, kon pơlei tôch kơ lăp đon hăm trong jang âu. Mă loi ‘noh jĭ trong jang pơjing tơdrong jang khŭl kơdră chĕp kơ̆l 2 tăl ( hŭt anih jang apŭng). Ƀôh tơdrong tơmơ̆t hơdai âu yua kơ đei yua atŭm ‘noh kon pơlei tôch kơ lăp đon; ưh kơ đei ƀôh pơma plơ̆ kiơ lơ̆m trong jang tơmơ̆t hơdai dôm anih jang. Kon pơlei tôch kơ tơgŭm, drơ̆ng lăp păng gô vang yak hơdai hăm Đảng păng teh đak bơ̆n”.