
Pơgê ƀât blŭng giĕng, ƀok Bùi Đức Thanh – oei tơ̆ plei Tân Sao, xăh Ia Hrung – đei măt tơ̆ Anih pơm hla ar kơ xăh vă pơm dơ̆ng hla ar teh. Teh unh hnam ƀok sơ̆ đei hla ar bơih, mă lei yoa đei tơdrong glăi đơ̆ng lơ sơnăm adrol sơ̆, hla ar tă chih hơvơ̆l hơnăn bơngai nai dơ̆ng. ‘Măng mă blŭng năm tơ̆ xăh ‘nao đơ̆ng rŏng kơ hơmet ming kơsô̆ teh, ƀok Thanh đei pơtho tơƀôh trong pơm pơkĕh hla ar tôch rơđăh: “Kăn ƀô̆, bơngai jang tơ̆ xăh ‘nao bơ̆ jang tôch đei yoa, pơvih ăn kon pơlei tôch ‘lơ̆ng. Đe duch pơm hla ar roi tơƀôh tôch hơlen, đang kơ ‘nŏh dôm bơngai jang tơgŭm kŭm roi tơƀôh, chih hơmet hla ar ăn inh ‘năi. Năr ‘nâu hla ar inh pơm vă jê̆ đang bơih”.

Jĭ 1 xăh đei lơ kon pơlei kon kông, mă lei Ia Hrung dơ̆ng mă 8/135 xăh, phường lơ̆m dêh char Gia Lai găh hla ar hô sơ đei iŏk pơm lơ̆m giĕng mă blŭng. Hlŏh 200 hlăk hla ar hô sơ đei iŏk pơm hăm kơmăy ngăl. Kơsô̆ hô sơ đe nôp trư̆k tuyê̆n truh 3/4, ăn ƀôh kon pơlei hlôi tơplih ming tơdrong juăt păng kơdih pơm kiơ̆ kơmăy pơvih trư̆k tuyê̆n ngăl. Yă Huỳnh Ngô Tùng Điệp – Phŏ Kơdră vei lăng kon pơlei xăh, pơm hloi Kơdră Anih pơm hla ar ăn tơpôl xăh Ia Hrung, ăn tơbăt: “Chih hơdăh, Khul kơdră pơgơ̆r tơring 2 tăl ‘nŏh vă pơvih ăn kon pơlei, khul grŭp păng anih tĕch mơdro tơ̆ tơring. Kơna tơdrong ‘nâu hơnơ̆ng đei Anih vei lăng kon pơlei xăh tơtă ăn bơngai jang, athei jang đang ‘lơ̆ng tơdrong jang kơtă lơ̆m năr hloi, kơna ưh kơ đei hiơ̆ hyĭn kiơ. Pơtih gia nhen scan (vă chih hăm kơmăy sô̆ ngăl), ‘nŏh kăn ƀô̆ gơ̆h iŏk yoa điên thoăi rơgei vă pơm, yă kiơ hrĕnh hlŏh ‘nŏh iŏk yoa sư”.

Kŭm hăm xăh Ia Hrung, lơ tơring nai nhen phường Pleiku, phường Quy Nhơn, xăh Phú Túc…kŭm iŏk pơm lơ hla ar hô sơ. Phường Thống Nhất tôch hơiă, mưh dơ̆ng mă 5 lơ̆m dêh char găh kơsô̆ hô sơ đei pơm, păng pơjao ăn kon pơlei kiơ̆ kơmăy điên tư. Yă Lê Thị Ánh Tuyết – Anih pơm hla ar ăn tơpôl phường Thống Nhất – ăn tơbăt: kơsô̆ hla ar pơm hăm kơmăy păng pơdreu kiơ̆ kơmăy điên tư lơ ưh lăp pơm tơjur ƀiơ̆ jơnăr pơm hla ar ăn kon pơlei đĕch, mă oei tơgŭm chih răk lơ̆m kơmăy atŭm kơ dêh char. Gơnơm thoi noh, lơ̆m dôm 'măng pơm hla ar đơ̆ng rŏng, kon pơlei ưh kăl nôp dơ̆ng lơ hla ar bơih, yoa lơ̆m kơmăy sô̆ đĭ đei tôm hla ar 'nŏh bơih: “Anih jang drơ̆ng nơ̆r hăm bơngai jang athei bơ̆ jang, pơm kiơ̆ mă trŏ trong nôp hla ar, chih tơmât dôm hla ar hô sơ, păng pơdreu hô sơ kiơ̆ anih đei hơgăt, ‘nŏh sư gơ̆h hơtŏk đei hla ar hô sơ pơm hăm điên tư. Atŭm hăm ‘nŏh, anih oei jang hơdoi hăm dôm lăm juăt jang, pơm hla ar hô sơ vă gơ̆h bơ̆ jang hiôk ‘lơ̆ng, tơtom vă hơmet pơ ‘lơ̆ng pơmat tat, tơhlăk tăk mưh pơm hla ar”.
Hrei ‘nâu, grŭp xăh, phường tơ̆ dêh char Gia Lai oei bơ̆jang 424 hla ar vei lăng– vă jê̆ 3 ‘măng pơting hăm adrong sơ̆. Tơ̆ hơnăp kơnh, dêh char vă hơnơ̆ng pơjao dơ̆ng tơdrong jang, hơtŏk hơnăp jang ăn khul kơdră tơ̆ tơring. Tơdrong jang roi lơ tơlĕch nơ̆r athei roi kơjung hăm khul kăn ƀô̆ xăh, phường: athei băt hơdăh trong pơm hla ar, chih tơmât, pơm hăm kơmăy sô̆ mưh pơm hla ar ăn kon pơlei.

Kiơ̆ ƀok Phạm Anh Tuấn – Phŏ Bí thư Đảng, Kơdră vei lăng kon pơlei dêh char Gia Lai, dêh char vă hơtŏk tơdrong pơtho pơhrăm kăn ƀô̆, tơmât jên man hơmet mă ‘lơ̆ng anih jang, trong, mă loi ‘nŏh iŏk yoa kơmăy kơmŏk roi tơbăt vă tơgŭm pơm hrĕnh ƀiơ̆ ăn khul bơngai jang, pơm lăp hăm tơdrong ‘mĕh vă lơ̆m chăl ‘nao. Hăm khul kăn ƀô tơ̆ tơring, Kơdră vei lăng kon pơlei dêh char Gia Lai athei hơtŏk đon jang mă tơnăp: “Tơdrong bơ̆ jang ‘nŏh athei jang kĕh lơ̆m năr. Iŏk kon pơlei păng anih tĕch mơdro pơm tơm, pơm bơngai vă pơvih ăn. Kon pơlei păng anih tĕch mơdro jĭ bơngai mă khul kơdră tơring vă pơvih ăn, kơna bơ̆n athei pơvih thoi yơ? ‘Nâu jĭ tơdrong jang kăch mang đơ̆ng teh đak, athei chă rim trong jang vă gơ̆h pơvih ‘lơ̆ng hlŏh. Đon tơchĕng đơ̆ng bơ̆n ‘nŏh ưh gơ̆h pơma kơdŭn, lăp pôm pơma găh trong bơ̆ jang đĕch”.
Khul kơdră pơgơ̆r tơ̆ xăh, phường tơ̆ Gia Lai blŭng a ăn ƀôh khul kơdră tơring roi jê̆ kon pơlei ƀiơ̆ păng bơ̆ jang, pơm bơ̆n hla ar roi hrĕnh ƀiơ̆. Mă lei, vă năm truh 1 tơdrong jang pơm hla ar hăm kơmăy kơmŏk ‘nao ‘lơ̆ng rơgei, hiôk hian ăn kon pơlei păng anih tĕch mơdro, oei kăl hơmet pơ ‘lơ̆ng dơ̆ng anih jang, kơmăy ki thuơ̆t păng hơtŏk hlŏh dơ̆ng tơdrong rơgei, jơhngâm đon tơnăp mưh pơvih pơvăn đơ̆ng khul kăn ƀô̆ tơ̆ tơring tơ̆ hơnăp ning mônh kơnh.
Viết bình luận