Tơdrong jang mir pơgar să rong nhŭng tĕch păng pơtăm ‘long tŏk bok đei Công ty Thiên Thành Tài tơlĕch jang tơ̆ pơlei Khơk Klong, tơring Rờ Kơi, apŭng Sa Thầy, dêh char Kon Tum. Kiơ̆ đơ̆ng Kơdră Công ty au, tơdrong jang au đeui iung jang lơ̆m 21ha teh, akŏp kon jên tơmơ̆t jang 165 ti hlak jên. Trong jang kơ hơnih au ‘nŏh 1 sơnăm 2 ‘măng rong tĕch nhŭng hăm rong đei 48.000 tŏ. Atŭm hăm ‘nŏh iŏk ĭch pơm mơ̆r, pơtăm ‘long rim kơ loăi hăm jang sa iŏk đei lơ̆m mĭnh sơnăm iŏk đei 300 ti hlak jên păng pơjing tơdrong jang ăn dang 100 ‘nu bơngai. Ƀok Phạm Văn Thành, Kơdră tơm Khul vei lăng Công ty Thiên Thành Tài tơbăt, lơ̆m prăt sơnăm tơlĕch jang, Công ty sơng iŏk đei tơdrong djru kơtang đơ̆ng kơdră chĕp pơgơ̆r tơring păng hơnih bơ̆ jang kơ dêh char Kon Tum:“Nhôn tơchơ̆t tơmơ̆t jên jang lơm hơnih au đei tơdrong tơgŭm djru phăl hơlăng đơ̆ng Hơnih bơ̆ jang vei lăng kon pơlei dêh char Kon Tum adoi nhen đơ̆ng Hơnih vei lăng kon pơlei apŭng Sa Thầy hlôi pơjing rơvơn ăn Công ty lơ̆m khei năr năm dăr lăng, chă rơ̆ih groi teh adoi nhen iŏk tơvih teh. Mă ƀar rim hơnih bơ̆ jang jei pơjing rơvơn toch hơ iă ăn Công ty lơ̆m pơm hla bơar au to vă Công ty gơ̆h tơlĕch jang lơ̆m khei ‘năr koăng hloh”.

Vă hơvơn rim bơngai tơmơ̆t jên jang pơjing atŏk tơ iung mŭk drăm-tơpôl, đơ̆ng rŏng Pơm lêh hop akŏm Đảng dêh char ‘măng mă XVI lơ̆m khei 9/2020, dêh char Kon Tum akŏm hơmet pơ ‘lơ̆ng trong jang tơmơ̆t jên jang, atŏk kơtang tơroi tơbăt găh rim tơdrong vă jang hơvơn tơmơ̆t jên jang păng drơ̆ng nơ̆r iung jang hơdoi hăm hơnih mơdro sa. Vă hơmet pơ ‘lơ̆ng, xek tơlang tĕnh koăng dôm tơdrong tơhlăk tơhlĭn kơ bơngai tơmơ̆t jên jang, Hơnih vei lăng kon pơlei dêh char Kon Tum vei kơjăp tơdrong jang “Chehphe hơnih mơdro sa, bơngai mơdro sa” lơ̆m tŏk bŏk giĕng rim khei; pơgơ̆r “Hop akŏm pơma dơnuh hăm hơnih mơdro sa” mĭnh sơnăm 2 ‘măng. Atum hăm kơdră dêh char, tơ̆ 2 tơrring jang mŭk drăm tơm, kơdră chĕp pơgơ̆r pơlei tơm Kon Tum hăm apŭng Kon Plông jei vei kơjăp trong tơƀŏp, pơma dơnuh, tơgŭm djru hơnih mơdro sa năm truh tơchă rơvơn tơmơ̆t jên jang adoi nhen pơm tơlĕch tĕch mơdro. Ƀok Nguyễn Thanh Mân, Kơdră chĕp pơgơ̆r hơnih vei lăng kon pơlei kơ pơlei tơm Kon Tum, tơbăt:“Mưh rim bơngai tơmơ̆t jên jang năm chă tơchĕng hơlen ‘nŏh pơlei tơm gô jing hơnih tơm tơroi tơbăt dôm tơdrong mă bơngai tơmơ̆t jên jang lăng truh, pơtih gia nhen tơroi tơbăt găh groi teh, tơroi tơbăt găh trong pơm hla bơar. Pơlei tơm atŭm hăm rim hơnih bơ̆ jang iung jang đĭ jơhngơ̆m pơchoh trong ăn hơnih bơ̆ jang vei lăng kon pơlei dêh char pơjing rơvơn ‘lơ̆ng hơ iă hloh ăn bơngai tơmơ̆t jên jang. Tơdăh bơngai tơmơ̆t jên jang đei tơnap tap ‘nŏh pơlei tơm gô jing bơngai chĕp kơ̆l dơ̆ng pang vang xek tơlang ăn ưh kơ lê̆ bơngai tơmơ̆t jên jang năm chă hơlen lăng”.

Hăm lơ trong jang hơ iă, đơ̆ng rŏng 2 sơnăm tơlĕch jang kiơ̆ Tơdrong tơchơ̆t Pơm lêh hop akom mă XVI kơ Đảng dêh char, Kon Tum hlôi hơvơn đei 68 tơdrong vă jang hăm kon jên tơmơ̆t jang hloh 18.000 ti hlak jên. Mă kăl, ưh khan lăp tơ̆ tơring rơvơn, kơtă hloi dôm apŭng atăih yăih, tơring kon kông oei tơnap tap nhen Tu Mrông, Đăk Tô, sa Thầy…jei krao hơvơn đei bơngai tơmơt jên jang hăm lơ tơdrong vă jang lơ̆m tơring. Yă Huỳnh Thị Thúy Hà, Kơ iĕng Kơdră chĕp pơgơ̆r Hơnih pơprŏ tơdrong jang păng Tơmơ̆t jên jang dêh char Kon Tum, tơbăt, dêh char tŏk bŏk hơnơ̆ng krao hơvơn rim bơngai tơmơ̆t jên jang lơ̆m lơ tơdrong jang, nhen: Pơm tơlĕch ‘long pơgang; choh jang sa; ŭnh hơyuh; tơmang pơhiơ̆; choh jang sa hăm kmăi kmŏk hơgei ... Păng vă Kon Tum đei jing hơnih dơ̆ng kơjăp kơ bơngai tơmơ̆t jên jang, dêh char tŏk bŏk hơmet pơ ‘lơ̆ng trong jang tơmơ̆t jên jang mơdro sa:“Dêh char sơkơ̆t hơdăh hơmet pơ ‘lơ̆ng cham char tơmơ̆t jên jang mơdro sa, tơgŭm djru hơnih mơdro sa ‘nŏh mĭnh lơ̆m dôm tơdrong kăl hloh vă hơvơn tơmơt jên jang, atŏk tơ iung mŭk drăm-tơpôl kơ dêh char. Dêh char lăng kơjăp atok kơtang hơmet pơ ‘lơ̆ng bơ̆ jang pơm hla bơar. Rim hơnih bơ̆ jang atŏk kơtang pơm keh đang tĕnh koăng rim hla bơar bơ̆ jang hăm rim tơdrong vă jang hlôi đei ăn tơmơ̆t jên jang vă rim hơnih mơdro sa hrôih tơlĕch iung jang tĕnh koăng păng jơnei. Iung jang ‘lơ̆ng pơjing rơvơn hloh hơvơn rim bơngai tơmơ̆t jên jang bơ̆ jang ‘lơ̆ng mơ̆t jang lơ̆m dêh char”.

Vă tơ iung pơjing ‘lơ̆ng hơ iă hloh ăn tơmơ̆t jên jang hơtŏ hơnơ̆ng, tơpăt, trŏ ƀlep hăm khôi luơ̆t, dêh char Kon Tum dang ei jei tŏk bŏk xek tơlang mă keh đang dôm tơdrong tim mă ‘lơ̆ng tơ̆ rim tơdrong vă jang mă bơngai tơmơ̆t jên jang ưh kơ pơm kiơ̆ nơ̆r pơkăp. Adoi xek tơlang kơhret rim bơngai, hơnih jang chă pơm tơnap tap lơ̆m jơ ‘năr bơngai tơmơ̆t jên jang năm chă dăr lăng hơlen păng tơmơ̆t jên jang lơ̆m dêh char.