Mŏ Phạm Thị Phương Đông - kê̆ toan Hnam trưng hŏk jăl 1 Y Ngông, thị xã Buôn Hồ (dêh char Đắk Lắk) đĭ 5 sơnăm kơ âu hơrih hơdai hăm tơdrong jĭ hư plei lĕn. Bơ̆jang tơ̆ hnam hŏk hai, hơnơ̆ng rim giĕng kơdâu plei lĕn tơ̆ Hnam pơgang Đa khoa thị xã Buôn Hồ hai, mŏ ‘noh jĭ bơngai tơm kơ ŭnh hnam iĕ ƀơ̆t klo sư jang chŭn mir păng năm jang thuê hơtăih kơ hnam. Iŏk đei kơsơ̆p hla ar ‘mơ ‘met đei kơjă 5 triệu hlak jên đơ̆ng tơdrong jang “Mut, săng kô măih” mŏ Đông pă gơh ôn hrĭ jơhngơ̆m  tơroi:

“Kơsơ̆p hla ar mut, săng kô măih âu tơgŭm đei ĭnh lơ dêh, ĭnh chă răt đei pơgang kơ na ĭnh tôch kơ bơnê. Gơnang đơ̆ng noh pơm ăn kơ dih kâu ĭnh dă ƀiơ̆ kơ gleh lap ƀiơ̆, đei tưk tơiung jơhngơ̆m pơjei hăm jĭ jăn”.

Tơdrong tơroi kơ ŭnh hnam đảng viên Y K’Lơn Niê oei tơ̆ plei H’Né, xăh Ea Yông kŭm jing tơbôh hơdăh ‘lơ̆ng ăn iŏk yua đơ̆ng tơdrong jang “Kơsơ̆p hla ar ‘mơ ‘met Mut ,săng kô măih”. Hăm 2 ‘nu kon ‘lơ̆p tŏk bŏk sơnăm năm hŏk, klo kăn măr sư lăp đei 2 sao chŭn păng 1 hlak teh pơtăm cheh phe. Pŭ trăp mŭk drăm athei ‘nhŏng Y K’Lơn măh năm jang thuê hơtăih, oei mŏ H’Puê Niê - hơkăn sư, jang kŏng nhân hơtăih kơ hnam 10 km. Sơnăm 2024, ŭnh hnam sư đei Anih jang Đảng thị xã Buôn Hồ pơjao asong kơ sơ̆p hla ar ‘mơ ‘met jên đei kơjă 12 triệu hlak jên. Đơ̆ng kơ sô̆ jên âu, mŏ H’Puê răt 4 tŏ nhŭng yŏng. Đơ̆ng rŏng 4 khei vei lăng, nhŭng mă blŭng hơnhăk ăn 24 triệu hlak jên. Gơnang đơ̆ng ‘noh, ŭnh hnam sư đei tơdrong hiôk hơnơ̆ng pơih să vei rong kon tơrong, sơđơ̆ng tơdrong hơrih sa.

 “Ĭnh bơnê kơ iĕm hlôi tơgŭm ĭnh lơ̆m tơdrong rong nhŭng. Mă hơdăh ‘noh jĭ Anih jang Đảng thị xã hlôi tơgŭm kơsơ̆p hla ar ‘mơ ‘met jên “Mut, săng kô măih” hăm kơsô̆ jên 12 triệu vă ŭnh hnam nhôn răt nhŭng rong. Tơdrong jang rong nhŭng âu lăp hăm tơdrong hơrih kơ ŭnh hnam nhôn. Đơ̆ng rŏng âu, ŭnh hnam nhôn gô hơnơ̆ng hơtŏk tơiung rong nhŭng vă tơdrong hơrih sa sơđơ̆ng ƀiơ̆”. 

Tơ̆ rŏng dôm kơsơ̆p hla ar ‘mơ ‘met jên ‘noh jĭ tơdrong vang tơgŭm ưh kơ đei bu băt mă lei kơjăp đơ̆ng rim kang ƀô̆, đảng viên. Mŏ Nguyễn Thị Trúc tŏk bŏk bơ̆jang tơ̆ Khŭl roi tơbăt păng Krao hơvơn kon pơlei kơ Anih jang Đảng thị xã Buôn Hồ roi tơbăt, rim ‘nu lơ̆m anih jang tă kơ ‘mơ ‘met kơdih ngăl, ƀơ̆t lăp 5 triệu, 3 triệu, dăh mă lăp 2,3 hrĕng hlak jên, mơ̆ng kiơ̆ lơ̆m tơdrong đei đơ̆ng rim bơngai, vă gơh vang tơgŭm dôm bơngai đei tơdrong hơrih sa pơmat tat.

“Ĭnh ƀôh thoi âu, tơdrong jang ‘nâu đei tơdrong ‘lơ̆ng tôch kơ dêh, tôch kơ ‘mêm mơnat. Ƀơ̆t kơplăh nhôn tơgop tơmam mă khan iĕ đĕch ră mă lei đei tơdrong ‘lơ̆ng dôm đảng viên đei tơdrong hơrih sa pơmat tat, păng kŭm kiơ̆ đơ̆ng tơdrong jang ‘nâu, dôm đảng viên đei tơdrong hơrih sa pơmat tat gơh jang mŭk drăm hơgei, klăih đơ̆ng dơnuh hin păng yak tŏk”.

Ƀok Nguyễn Văn Út - Kơdră Khŭl jang tơroi tơbăt păng Krao hơvơn kon pơlei kơ Anih jang Đảng thị xã Buôn Hồ, dêh char Đắk Lắk roi tơbăt, tơdrong jang “Kơsơ̆p hla ar ‘mơ ‘met jên Mut, săng kô măih” đei tơlĕch jang đơ̆ng sơnăm 2023, kiơ̆ lơ̆m jơhngơ̆m đon hŏk pơhrăm păng pơm kiơ̆ nơ̆r pơtho đơ̆ng ƀok Hồ, hơrih ‘mơ ‘met păng vang tơgŭm. Kang ƀô̆, đảng viên chă tơgop kơdih vă pơm jên mong, tơgŭm dôm đảng viên tơƀơ̆p pơmat nat, mă loi ‘noh jĭ dôm đảng viên bơngai kon kông, hơrih tơ̆ tơring hơtăih hơtŏ. Nguyễn Văn Út tơroi:

“Tơdrong gĭt kăl ƀơ̆t pơjao ‘noh đei 3 pơlei ‘noh plei Tring 1,2,3 kơ phường An Lạc, tơ̆ noh kŭm đei đảng viên ‘noh bơngai kon kông pơmat tat mă lei đe sư pơjăng iŏk hla ar ‘mơ ‘met jên âu păng đe sư athei pơjao ăn kơ đảng viên ‘noh bơngai kon kông tơ̆ dôm xăh đei tơdrong hơrih sa pơmat tat. Kiơ̆ đơ̆ng tơdrong hŏk pơhrăm păng pơm kiơ̆ nơ̆r Ƀok Hồ, hăm jơhngơ̆m đon đơ̆ng kang ƀô̆ đảng viên ‘mêm kơ eng dih băl, tơgŭm dih băl hlôi pơm đei jơhngơ̆m păr ang lơ̆m kang ƀô̆ đảng viên đơ̆ng pơđĭ tjị xã”.

Lăp đơ̆ng rŏng 2 sơnăm tơlĕch jang, lơ̆m thị xã Buôn Hồ hlôi pơjao 175 blăh Kơsơ̆p hla ar ‘mơ ‘met jên Mut, săng kô măih hăm akŏm kơjă 769 triệu hlak jên. Dôm kơsơ̆p hla ar ‘noh hlôi tơgŭm đảng viên tơmơ̆t jên jang sa, răt ‘long hơdrĕch, hơmet jĭ păng sơđơ̆ng tơdrong hơrih sa. Rim kơ sơ̆p hla ar ưh khan lăp hơnhăk kơjă kăp gĭt tơmam drăm, mă oei jing tơdrong pơlung jơhngơ̆m kăp gĭt, hơtŏk dơ̆ng jơhngơ̆m hơdrin vă  yak tŏk lơ̆m pơmat tat. Yă H’Blă Mlô, Phŏ Bí thư Anih jang Đảng thị xã Buôn Hồ, dêh char Đắk Lắk roi tơbăt:

“Tơdrong jang âu lang să truh bơngai đei sa yua kŭm nhen khŭl jang đảng, đảng viên lơ̆m tơdrong hŏk pơhrăm pơm kiơ̆ jơ hngơ̆m đon ‘lơ̆ng đơ̆ng Hồ Chí Minh. Đơ̆ng rŏng proh hơmet anih bơ̆jang, dôm tơdrong kiơ đei khŭl chĕp kơ̆l pơgơ̆r kơ Anih jang Đảng thị xã lơ̆m khei ‘năr âu ki jang ‘lơ̆ng ‘noh đơ̆ng rŏng âu gô đei rim xăh  phường hơnơ̆ng tơlĕch jang kiơ̆, pơm liơ tơdrong jang ‘noh truh đei hăm dôm đảng viên dơnuh hin.”

Mĭnh kơ sơ̆p “ Hla ar ‘mơ ‘met jên Mut, săng kô măih” jing 1 tơdrong tơƀôh hơdăh ‘lơ̆ng ăn jơhngơ̆m đon tơgoăt tơgoăl. Vang tơgŭm păng hơnăp jang lơ̆m khŭl kang ƀô̆, đảng viên Anih jang Đảng thị xã Buôn Hồ, dêh char Đắk Lắk. Ưh khan lăp tơgŭm găh tơmam drăm, tơdrong jang oei tơiung đon lui, jơhngơ̆m hơdrin yak tŏk păng hơ pơi ‘meh yak hloh pơmat lơ̆m rim đảng viên. Đơ̆ng dôm tơdrong jang hơdăh ‘lơ̆ng păng ‘mêm mơ nat ‘noh, jơhngơ̆m đon ‘lơ̆ng đơ̆ng Ƀok Hồ hlôi păng tŏk bŏk đei păr ang pran kơtang, jing tơdrong tơklep ‘lơ̆ng lơ̆m bơ̆jang, tơgop pơjing khŭl jang Đảng roi ‘năr roi rơgoh, pran kơjăp đơ̆ng tơring.