Ŭnh hnam ƀok Hoàng Trung Thành đei 8 sao teh pơtăm chehphe hrao hăm sâu riêng tơ̆ tŏk bŏk thôn Tân Sơn, tơring Ea Yông. Mir au đei mĭnh poăt hơgăt teh găh Tơdrong vă pơm trong glung rĕnh Khánh Hòa – Buôn Ma Thuột găn hloh. Ƀok tơroi, băt tơdrong hloh 4 sao teh mir kơ ŭnh hnam găh lơ̆m hơgăt teh vă iŏk tơvih pơm trong ‘noh bơ̆n drơ̆ng nơ̆r hloi, kơ yuơ ‘nau jing trong bơ̆ jang đơ̆ng Đảng, Teh đak. Jăl trong đei pơjing gô tơgop atŏk tơ iung mŭk drăm-tơpôl ưh khan lăp hơdrô̆ apŭng Krông Pach mă lei pơ đĭ lơ̆m dêh char Đak Lăk, đei ‘măng pơ đĭ lơ̆m tơring Tây Nguyên hloi. Tŏk bŏk sơnăm 2022, kang ƀô̆ bơ̆ jang groi teh hlôi năm pơtŏ, jô̆ hơlen păng pơm hla kak vă bơ̆ jang hrŭ ăn iŏk tơvih teh. Ƀok Hoàng Trung Thành tơroi:“Kang ƀô̆ bơ̆ jang jô̆ hơlên tơroi tơbăt ăn kon pơlei, nhôn ba đe sư năm tơ̆ hơgăt teh vă iŏk tơvih, đe hăp chă hơgăt pơtŏ, chă jô̆ hơlen ‘long pơtăm lơ̆m hơgăt teh vă hrŭ ăn. Rim pang vang chă jô̆ hơlen, pơtŏ hơlen atŭm hăm ŭnh hnam lăng tôm ‘nŏh drơ̆ng dih băl.”

 Tơ̆ thôn Tân Sơn tơring Ea Yông, ŭnh hnam Lê Đình Thiên jei đei 4 sao teh chehphe hrau hăm tiu, găh hơgăt teh kăl vă iŏk tơvih 1/4 hơgăt teh. Ƀok Thiên tơbăt, trong bơ̆ jang đơ̆ng Đảng păng Teh đak ‘nŏh ŭnh hnam bơ̆n pơm kiơ̆ ngăl. Ƀok lăp hơpơi ‘mĕh vă tơdrong bơ̆ jang hrŭ ăn đei tơlĕch jang mă tơpăt, tơroi mă rơhăo, veh ver tơdrong hiong răm ăn kon pơlei. Ƀok Lê Đình Thiên pơma tơbăt jơhngơ̆m đon: “Pơtih gia lơm pơlei hrei au đei lơ hơnih 500 – 600 triu hlak jên lơ̆m 1 sao, ‘nŏh mir pơgar đe đei lơ sâu riêng; lơ mir pơgar tiu, chehphe ‘nŏh re ƀiơ̆ dang 300 – 400 triu hlak jên lơ̆m 1 sao. Trong glung renh tơdrong chă hrŭ ăn tơgăl lei tơnap, mă lei kon pơlei hơpơi ‘mĕh vă hơtŏ hăm tơdrong đe tech răt yan au, dăh mă tŏ sĕt ƀiơ̆ jei hơtŏ 70 – 80% ‘nŏh kon pơlei nhôn mă lăp đon.”

Tơring Ea Yông, apŭng Krông Pach đei 93 hlak mir kơ 107 ŭnh hnam păng mĭnh hơnih lui khop găh lơ̆m Tơdrong vă jang pơm trong gre rĕnh Khánh Hòa – Buôn Ma Thuột. Akŏp hơgăt teh iŏk tơvĭh ‘nŏh 250.672 m2. Ƀok Nguyễn Phụng Minh – Kơdră chĕp pơgơ̆r Hơnih bơ̆ jang vei lăng kon pơlei tơring tơbăt, hrei au hlôi đei 192 lơ̆m 193 hlak mir đĭ chă pơtŏ đang, bơ̆ jang chă jô̆ hơlen dơnơm ‘long nhen lĕ vă keh đang; khul bơ̆ jang jô̆ hơlen jei tŏk bŏk pơm hla bơar pơjao ăn Hơnih tơm Atŏk tơ iung Hơgăt teh apŭng Krông Pach vă iung jang rim trong jang hrŭ ăn.“Nhôn pơjao pơđĭ hla bơar ăn Hơnih tơm bơ̆ jang Groi teh kơ apŭng. Đơ̆ng noh, hơnih au chă pơlăp kơjă păng pơm hla bơar pơtruh ăn tơring tơƀô̆h tơbăt ăn kon pơlei ‘măng mă 1. Tơdăh ŭnh hnam ayơ tim mă lăp hăm ‘măng mă 1, nhôn chă apĭnh apŭng chă hơmet dơ̆ng, đơ̆ng rŏng ‘nŏh tơbăt ăn ‘măng mă 2. Mưh tơƀôh tơbăt ‘măng mă 2 kon pơlei drơ̆ng nơ̆r ‘nŏh ‘măng mă 3 krao hơvơn kon pơlei năm iŏk jên hrŭ ăn.”

Tơdrong vă jang pơm trong glung rĕnh Khánh Hòa - Buôn Ma Thuột kơjung hơtăih 118km, yak hloh 4 apŭng kơ dêh char Đak Lăk ‘nŏh: Krông Pắk, Krông Bông, Ea Kar păng M’Đắk hăm thĭ xah Ninh Hòa kơ dêh char Khánh Hòa. Lơ̆m au hơdrô̆ tơ̆ apŭng Krông Pach đei trong hơtăih kơjung 33km, yak hloh 8 tơring: Hòa Đông, Ea Knuếc, Ea Yông, Ea Kênh, Hòa Tiến, Tân Tiến, Ea Uy păng Vụ Bổn. Akŏp hơgăt teh iŏk tơvih ‘nŏh 200ha păng dang 200ha jih trong ming man kơ hloh 1.000 ŭnh hnam kon pơlei păng mĭnh ƀar hơnih jang.

Yă Ngô Thị Minh Trinh - Kơ iĕng Kơdră chĕp pơgơ̆r Hơnih vei lăng kon pơlei apŭng Krông Pach, bơngai vang jang lơ̆m Khul jang hrŭ ăn iŏk tơvih teh apŭng tơbăt, truh dang ei, apŭng hlôi jang keh đang vă jê̆ 2.000 hla bơar, jơnei 98% hơgăt teh kăl iŏk tơvih; pơm hla bơar 157 lơ̆m 208 ŭnh hnam vă năm oei tơ̆ hơnih hle; pơjing 16,5 ha teh pơm 3 pơlei oei ‘nao tơ̆ rim tơring Tân Tiến, Vụ Bổn păng Ea Knuếc. Kiơ̆ đơ̆ng yă Trinh, vă veh ver tơdrong “tơhlăk tơhlĭn” lơ̆m hrŭ ăn iŏk tơvih teh mă lơ tơdrong vă jang rơbau ti hlak jên tơ̆ Đak Lăk tŏk bŏk tơƀơ̆p, apŭng gô iung jang tơdrong jang au tôch hơlen, tơpăt, sơđơ̆ng đei iŏk yua ăn kon pơlei. “Nhôn iung jang hơdoi hăm hơnih jang tơgŭm ăn, khul dăr lăng năm truh rim mir pơgar ưh khan lăp năm truh tơring lơ loh mă pơlăp kơjă. Hăm trong jang hơlen lơ loh, kiơ̆ kơ ĭnh kon pơlei gô lăp đon drơ̆ng nơ̆r, kơ yuơ tôch trŏ lăp. Bơ̆n iung jang mă tơnăp, mă tơpăt vă đei iŏk yua pơđĭ ăn kon pơlei, ăn teh đak păng trŏ ƀlep hăm khôi luơ̆t tơchơ̆t ăn.”

Hăm iung jang tĕnh koăng, tơpăt lơ̆m bơ̆ jang iŏk tơvih teh ư̆h khan lăp hơdrô̆ tơ̆ apŭng Krông Pach, hơmŏ tơdrong jang au đei ming man trŏ ƀlep hăm khei ‘năr pơkă hơdrol năr 30/6 kơnh. Găh trong glung rĕnh Buôn Ma Thuột– Khánh Hòa tơgoăt tơring kơdrơ̆m Tây Nguyên - Nam Trung Bộ, tơgoăt “bri” hăm đak dơsĭ” gô keh đang ƀlep trong tơlĕch ăn, pơjing rơvơn atŏk tơ iung mŭk drăm, tơmang pơhiơ̆, hơvơn tơmơ̆t jên jang, tơgŭm ‘lơ̆ng hơ iă ăn chă chơ, yak tĕnh koăng, sơđơ̆ng.