
Kiơ̆ nơ̆r tơroi đơ̆ng Anih vei lăng jŏh ayŏ kơ dŏ xoang, Tơplŏng kơdâu păng chă tơmang lăng Lâm Đồng, 6 khei blŭng sơnăm ‘nâu, Lâm Đồng sơng đei hlŏh 12 triu ‘nu tơmoi chă tơmang lăng, iŏk đei 54% nơ̆r hơgăt păng tŏk 20% pơting hăm khei âu sơnăm sơ̆. Lơ̆m kơsô̆ âu đei vă jê̆ 800.000 ‘nu tơmoi đơ̆ng teh đak đe, tŏk 56%. Tơdrong tơmât hơdai 3 dêh char Lâm Đồng, Bình Thuận păng Đắk Nông pơjing đei dêh char Lâm Đồng ‘nao hlôi pơih đei lơ tơdrong ‘lơ̆ng vă anih chă tơmang lăng jang tŏk, jang đei đon pơhnŏng sơng đei hlŏh 22,4 triu ‘nu tơmoi lơ̆m sơnăm 2025.

Mă lei, tơdrong pơih xă tơring vei lăng kŭm tơlĕch lơ tơdrong nol găh anih jang, trong nơnăm, khul bơngai jang păng tơdrong kĕ jang đơ̆ng dôm tơring hai… Kiơ̆ ƀok Nguyễn Văn Lộc, Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng Lâm Đồng, ‘nâu jĭ dôm tơdrong oei găn trong, kăl jăh hơmet pơ ‘lơ̆ng.
“Bơ̆n dar dĕh chih hơmet dơ̆ng lakak anih chă tơmang lăng ăn Lâm Đồng, mă lei ưh kơsĭ sut pơđĭ dôm kơjă kăp gĭt đơ̆ng chă tơmang lăng tơ̆ Đà Lạt, Phan Thiết ôh, mă ‘nâu ‘nŏh bơ̆n pơm pơ ‘nao sư. Pơm thoi yơ vă gơ̆h iŏk yoa ‘lơ̆ng anih chă tơmang lăng tơ̆ Đà Lạt, chă tơmang lăng tơ̆ Đắk Nông păng tơguăt hăm chă tơmang lăng tơ̆ đak dơsĭ, pơjing đei trong chă tơmang lăng đơ̆ng đak dơsĭ, groi kông truh tơ̆ tơring tơmăn. Vă atŏk tơiung chă tơmang lăng ‘noh athei tơmât hơdai đĭ đăng, mă loi ‘nŏh găh anih jang, trong nơnăm. Đơ̆ng sơ̆ Đà Lạt – Phan Thiết, Đà Lạt – Gia Nghĩa đơ̆ng rŏng kơ tơblăh rơngei truh dang ei oei ‘moi kiơ̆ dôm trong so đĕch. Hơpơi ‘mĕh tơ̆ hơnăp kơnh, dêh char tơmât jên pơm hơmet dôm trong ‘nâu”.
Lăp đơ̆ng rŏng kơ tơmât hơdai jing dêh char ‘nao, Anih vei lăng kon pơlei dêh char Lâm Đồng athei Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng jang hơdoi hăm Anih jang Khoa hŏk păng kơmăy kơmŏk tơchĕng hơlen, chih pơjing dôm trong jang ‘lơ̆ng vă pơvih ‘lơ̆ng hlŏh ăn tơdrong ‘mĕh vă đơ̆ng tơmoi, tơiung anih chă tơmang lăng jang tŏk pran ‘lơ̆ng.

Kiơ̆ nơ̆r athei đơ̆ng Anih vei lăng jang Khoa hŏk păng kơmăy kơmŏk dêh char Lâm Đồng, ƀât măt dang ei, dêh char vă tơmât hơdai dôm trang điên tư chă tơmang lăng kơ 3 dêh char so jing 1 trong điên tư chă tơmang lăng kơ dêh char ‘nao. Atŭm hăm ‘nŏh, tơmât hơdai dôm ứng dụng chă tơmang lăng lơ̆m điên thoăi rơgei kơ 2 dêh char Lâm Đồng păng Bình Thuận so, chih pơjing 1 app atŭm chih tơroi tôm tơdrong đei yoa ‘lơ̆ng găh chă tơmang lăng tơ̆ Đắk Nông hai. Vă hơtŏk kơsô̆ bơngai truh tơmang lăng, ứng dụng ‘nâu oei đei hloi AI, tơmât hơdai tơdrong rơgei đơ̆ng kơmăy kơmŏk vă roi tơbăt.
Ƀok Võ Thành Công, Kơdră Anih vei lăng jang Khoa hŏk păng kơmăy kơmŏk dêh char Lâm Đồng ăn tơbăt: “Chă tơmang lăng tơ̆ plt Hồ Chí Minh tôch ‘mĕh chă tơmang lăng ăn unh hnam 4 ‘nu lơ̆m 3 năr, đe sư lăp kăl teh chư dăh mă pơma lơ̆m app bơ̆n, ‘mĕh yă kiơ. App gô roi tơƀôh hloi: năr mă mônh năm truh tơ̆ yơ, anih yơ, oei ƀich tơ̆ yơ, hao gre kiơ păng năm lăng yă kiơ… Tơdăh jang đei thoi noh, tơmoi chă tơmang lăng gô năm truh tơ̆ dêh char bơ̆n roi lơ ƀiơ̆”.
Ƀok Hồ Văn Mười, Kơdră vei lăng kon pơlei dêh char Lâm Đồng akhan, tơring đei lơ tơdrong ‘lơ̆ng vă atŏk tơiung jŏh ayŏ kơ dŏ xoang, tơplŏng kơdâu păng chă tơmang lăng. Lơ̆m noh Đà Lạt đei krao ‘nŏh ‘Lâm Đồng ƀĕnh kơ pơkao’, Bình Thuận ‘nŏh jĭ ‘Lâm Đồng đak dơsĭ hlăng ‘lơ̆ng’, Đắk Nông ‘nŏh krao ‘Lâm Đồng bri kông’. Đĭ đăng tơdrong pran ‘lơ̆ng tih âu athei đei trong tơmât hơdai mă ‘lơ̆ng ‘nŏh anih chă tơmang lăng tơ̆ tơring gơ̆h kĕ jang tŏk pran kơjăp păng đunh đai.
“Chih hơdăh Lâm Đồng đei lơ tơdrong ‘lơ̆ng găh jŏh ayŏ kơ dŏ xoang, tơplŏng kơdâu păng chă tơmang lăng. Tơdrong kăl dang ei ‘nŏh iŏk yoa dôm tơdrong ‘lơ̆ng ‘nâu thoi yơ ‘nŏh kăl hlŏh. Đon tơchĕng dêh char ih, dêh char inh, dêh char to jing 3 ‘nŏh ưh kơ trŏ ôh. 3 dêh char nhen gâu gŏ, tôch pran, mă lei gâu gŏ âu tam mă hơnơ̆ng. Dang ei tơring đak dơsĭ păng tơring pơkao ‘nŏh ƀôh ‘lơ̆ng sơđơ̆ng ƀiơ̆ bơih, mă lei tơring Đắk Nông yoa lơ tơdrong kơna oei tam mă pran, athei tưk tơiung hlŏh dơ̆ng”.
Viết bình luận