Đơ̆ng adrol kơ têt nguyên đan truh dang ei, tơring bri 'long hơngo ƀônh ƀơm unh xa tơ̆ tơring pơkăp 263 lơ̆m tơring teh Phúc Thọ, apŭng Lâm Hà (Lâm Đồng) hơnơ̆ng đei Jơnŭm jang vei lăng bri hơmŏ Lâm Hà păng rim unh hnam iŏk vei lăng bri hơtŏk pran tơdrong chă hơlen, axong bơngai gak măng năr vă dăh tom ƀôh băt mưh đei unh xa bri. Kiơ̆ kơ ƀok Dương Thanh Quang, Kơdră Khul juăt jang kơsô̆ 5, Jơnŭm jang vei lăng bri hmŏ Lâm Hà, kơtă đơ̆ng blŭng pơyan phang, kang ƀô̆ jang tơ̆ tơring bri hlôi akŏm khul jang chă choh chong 'nhĕt uh, choh chor thong hơbong pơgăn unh xa păng bơ̆ hơdrơ̆n pơk vă hơlen păng pĭt unh xa bri: “ 'Nhŏng oh nhôn axong tơdrong jang, hơlen akŏm dơ̆ng khul jang iŏk vei lăng vă pơkăp hơlen măng năr hloi. Atŭm hăm noh, hơtŏk khul jang vă tơgŭm ăn dôm anih hơnơ̆ng ƀônh đei unh xa atŭm hăm đe 'nhŏng oh chă hơlen măng năr hloi”.

Lâm Hà đei hloh 34.000 ha bri, mă lơ noh hơgăt bri pơtăm hrơ hrâu, tơkuh hăm mir ƀa choh jang kơ kon pơlei noh tơdrong mă ƀơm unh xa noh hiôk kơ đei. Ƀok Hồ Nghĩa Nam, Phŏ Kơdră Jơnŭm jang vei lăng bri hơmŏ Lâm Hà ăn tơbăt, atŭm hăm hơtŏk pran tơdrong hơlen, tơdrong pơjing păng tơlĕch drơ̆ng minh dôm trong jang tang găn păng pĭt unh xa bri tŏk bŏk đei anih jang tơrĕk pơm jang: “Jơnŭm jang vei lăng bri hlôi hơmet dôm hơdrơ̆n pơk vei hơlen unh xa bri păng chă răt minh ƀar tơmam drăm kăl 'măn ăn tơdrong jang pĭt unh xa bri. Dang ei, dôm khul juăt jang tŏk bŏk oei keh đang dôm tơdrong pơkăp jang, vă vei xơđơ̆ng lơ̆m xơnăm 2023 ưh đei lê̆ unh xa rok tơ̆ bri”.

 Lâm Đồng jing tơring đei lơ hơgăt bri 'long hơngo păng dôm hơdrĕch 'long bri ƀônh ƀơm unh xa, hăm hơgăt xă hloh 513.000 ha. Pơtơm ăh blŭng pơyan phang mă lei dêh char hlôi đei 3 'măng unh xa 'nhĕt uh ăh hơla bri. Gơnơm ƀôh băt păng pĭt unh xa tơtom noh ưh đei răm kiơ truh tơ̆ bri. Dang ei hơyuh 'năr tơ̆ Lâm Đồng tŏk bŏk ăh pơyan phang, tô̆ kơtang, ƀônh pơm ăn bri ƀơm unh xa. Anih jang vei lăng kon pơlei dêh char Lâm Đồng hlôi tơchơ̆t tơlĕch lơ hla bar pơgơ̆r rim anih jang đei tơrĕk noh ưh gơh pơhơi pơhŏ, athei akŏm tơlĕch lơ trong jang drơ̆ng minh vă tang găn păng pĭt unh xa bri.