Hăm hơnăn “Việt Nam – Năm vă ‘mêm”, lơ tơdrong tơgŭm găh kơjă pơvih pơvăn, jên chă tơmang lăng tơ̆ dôm anih chă tơmang lăng ‘lơ̆ng hơiă gô đei tơmât yoa. Dôm anih jang oei tơjur dơ̆ng yă truh 50% ăn gre chơ chuĕn, anih tep pơdơ̆h, sŏng xa, vei lăng jơhngâm pran… ‘Ngoăih kơ ‘nŏh, dêh char năng kăl tơdrong jang hơdoi vang pơm tơlĕch tơmam, hơmet anih truh ngôi, pơjing trong chă tơmang lăng ‘lơ̆ng rŏ, hơtŏk tơdrong tĕch tơmam ‘lơ̆ng đei kơtă tơ̆ tơring, mă loi jĭ dôm tơmam OCOP.

Ƀok Trần Thanh Hoài, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng Lâm Đồng ăn tơbăt, kơdih kâu bơngai Lâm Đồng gô jing “bơngai tang măt ăn tơdrong chă tơmang lăng”, adrin pơm lăp đon ăn tơmoi truh tơmang lăng, vang tơgop pơjing jơhngâm pran ăn anih chă tơmang lăng ƀât mă lơ̆m teh đak oei vă mât lơ̆m chăl jang tŏk iung ‘nao hrei ‘nâu.