Lâm Đồng kăl hơyak pran tŏk tơ iung, vei lăng năng tông tơdrong hơrih sa ăn kon pơlei
Thứ ba, 10:21, 15/07/2025 VOV/Amazưt tơblơ̆ VOV/Amazưt tơblơ̆
VOV4.Bahnar - Gơmăng (14/7), tơ̆ Đà Lạt, Kơ iĕng Thủ tướng Teh đak Nguyễn Hoà Bình hlôi bơ̆ jang hăm Khul kơdră chĕp pơgơ̆r Đảng dêh char Lâm Đồng găh tơdrong bơ̆ jang khul kơdră tơring 2 kâp păng bơ̆ jang hơmet ăn Hop akom tih Đang ƀô̆ rim hơnih jăl jang 2025 – 2030.

 

Tơ̆ Đà Lạt, tơring pơjing hơnih bơ̆ jang tơm kơ dêh char Lâm Đồng hrei ou đei hloh 1.300 ‘nu kang ƀô̆ đơ̆ng Dak Nông păng Bình Thuận bơ̆ jang. Hloh 8.000 ‘nu kang ƀô̆ uơ oei oei hơnơ̆ng proh ăn bơ̆ jang tơ̆ tơring so vă iŏk jang dôm tơdrong jang pơm hla bơar, pơjing rơvơn lơ̆m tơdrong xek tơlang tơtom dôm tơdrong jang ăn kon pơlei. Hăm 124 tơring, phương, tơring kăl lăp đơ̆ng rŏng proh hơmet, bơ̆ jang pơm hla bơar ăn kon pơlei hlôi iung jang ‘lơ̆ng. Rim hô sơ pơm keh đang hơdrol jơ ‘năr pơkă păng ƀlep jơ ‘năr pơkă jơnei 97% lơ̆m akop hloh 18.500 hô sơ. Kơ iĕng Thủ tướng hôn bơnê dôm tơdrong iŏk đei jơnei blŭng a mă dêh char Lâm Đồng hlôi iŏk đei lơ̆m bơ̆ jang kiơ̆ Khul kơdră chĕp pơgơ̆r tơring 2 kâp, vei kơjăp ‘lơ̆ng tŏk atŏk tơ iung mŭk drăm-tơpôl kơ tơring. Hơdrô̆ bơ̆ jang hơmet ăn Hop akŏm tih, dêh char păng tơring jei bơ̆ jang tôch kơ ‘lơ̆ng, trŏ ƀlep hăm trong pơprŏ jang păng tơdrong jang hlôi tơlĕch ăn. Kơ iĕng Thủ tướng Nguyễn Hòa Bình akhan, tŏk mŭk drăm kơ Lâm Đồng hrei ou tim mă tơgăl hăm dôm tơdrng đei, lăp iŏk jơnei 5%. ‘Ngoăih kơ ‘noh, tơdrong iung jang mĭnh ƀar tơdrong vă jang, hơnih jang tơm oei hiơ hiơ̆, tơnap tap lơ̆m iŏk tơvih teh; tơlĕch kon jên teh đak tơmơ̆t jang tim mă ƀlep hăm nơ̆r athei; bơ̆ jang vei lăng mŭk drăm char char tim mă ‘lơ̆ng; mĭnh ƀar ‘nu kon pơlei tơring kon kông oei tơnap tap ... Dôm tơdrong ou dêh char kăl atŏk kơtang chĕp pơgơ̆r pơrô̆ jang, mă kăl lăng ba kơjăp xek tơlang păng hơmet pơ ‘lơ̆ng lơ̆m khei năr kơnh. 

VOV/Amazưt tơblơ̆

Viết bình luận

TIN CÙNG CHUYÊN MỤC

Video