Pơlei Hàng Làng, tơring Gung Ré, apŭng Di Linh, dêh char Lâm Đồng găh lơ kon pơlei ‘noh bơngai kon kông. Dôm sơnăm ou ki, tơdrong tơ iung pơjing păng atŏk tơ iung đảng viên hăm dôm kon pơlei oei sa ‘lơ̆ng đei kơdră chĕp pơgơ̆r, chi ƀô̆ pơơlei lăng kơjăp. Kră pơlei K’Keo, Bí thư Chi bộ pơlei Hàng Làng tơbăt, gơnơm lăng kơjăp pơtho pơhrăm, atŏk tơ iung đang viên ‘lơ̆ng tơplih ăn tơmơ̆t lơ, 100% đang viên lơ̆m chi bô̆, mă kăl rim đang viên sơnăm mơlôh jei ling lang tơnăp, iung jang ‘lơ̆ng hơnăp jang pơm jŭk yŭk trong hơlou lơ̆m atŏk tơ iung choh jang sa păng hơrih sa.“Sơ̆, chi ƀô̆ lăp đei 8 ‘nu đang viên, truh dang ei hlôi đei 13 ‘nu, lơ̆m ou găh lơ ‘noh đang viên bơngai kon kông. Lơ̆m sơnăm ou, chi ƀô̆ hơnơ̆ng hơlen păng 2 ‘nu bơngai kon pơlei oei sa ‘lơ̆ng năm hŏk pơhrăm găh Đảng păng mưh hŏk đang ‘noh chi ƀô̆ gô lăng hơlen păng tơmơ̆t lơ̆m khul. Chi ƀô̆ lăng kơjăp dôm kon pơlei oei sa ‘lơ̆ng, jang sa hơgei, đei jơhngơ̆m đon ‘meh mơ̆t lơ̆m Đảng ‘noh nhôn ăn năm hŏk pơhrăm găh Đảng păng tơmơ̆t lơ̆m Đảng. Mưh tơmơ̆t đang, rim đang viên jei tôch tơnăp, ling lang pơm jŭk yŭk trong hơlou lơ̆m rim tơdrong jang vă kon pơlei kiơ̆ yok rok jơ̆ng jang kiơ̆”.

Jei lei lăi, tơring kon kông tơring Dă Nhim, apŭng Lạc Dương, dêh char Lâm Đồng jei jang ‘lơ̆ng bơ̆ jang pơtho pơhrăm, pơjing rơvơn ăn rim kon pơlei oei sa ‘lơ̆ng đei mơ̆t lơ̆m khul Đảng. Lơ̆m hloh 120 ‘nu đang viên lơ̆m 10 chi ƀô̆ kơ tơring Dă Nhim ‘noh hloh mĭnh poăt bơngai kon kông hơdrung K’ho. Mŏ Cil Pam Ka Duyên, đảng viên sơnăm mơlôh kơ Chi ƀô̆ pơlei Dă Tro, tơring Dă Nhim akhan, đei bơngai ‘lơ̆ng, tơnăp bơ̆ jang ‘noh tơdrong jang chă pơrô̆ pơrôp, pơtho tơbăt trong bơ̆ jang đơ̆ng Đảng păng khôi luơ̆t Teh đak mă hơnhăk đei jơnei hơ iă, kon pơlei mă jang kiơ̆. Kơ yuơ lơ loh, vă kon pơlei lui păng pơ̆n tơplih trong jang sa, tơplih ‘long pơtăm, hơnhăk rim ‘long pơtăm ‘nao choh jang sa, pơm hơtŏk jang sa iŏk yua kơjăp ‘noh rim đang viên kăl hơnơ̆ng pơm jŭk yŭk trong hơlou.“Lăp đơ̆ng rŏng ba đei jing đang viên ‘noh ba đei dơ̆ng rơvơn băt hlôh ƀôh hơdăh hloh dơ̆ng găh trong bơ̆ jang đơ̆ng đảng, khôi luơ̆t Teh đak. Đơ̆ng noh, ba mă đei trong jang ‘lơ̆ng tơdrong jang mă chi ƀô̆ pơjao ăn. Ba hlôi tơgŭm djru ăn kon pơơlei lơ̆m pơlei bơ̆n lơ hloh dơ̆ng, mă hơdăh ‘noh chă pơrô̆ pơtho ăn kon pơlei tơplih ‘long pơtăm, hơdrin choh jang sa pơtăm ‘long pơtăm hrôih vă jang sa iŏk yua kơjăp hloh, atŏk tơ iung mŭk drăm ŭnh hnam. Dang ei tơdrong hơrih sa kơ kon pơlei kon kông tơ̆ ou hlôi dă ƀiơ̆ tơnap tap pơtêng hăm sơ̆”.

Kiơ̆ đơ̆ng ƀok Cil Ha Poh, Bí thư Đảng tơring Đạ Long, apŭng Đam Rông, dêh char Lâm Đồng, vă sơđơ̆ng ăn bơ̆ jang atŏk tơ iung đang viên, mă kăl rim đang viên mơlôh lơ̆m pơlei kon kông, tơdrong pơtho pơjing dôm bơngai kon pơlei lơ̆m rim khul jang chinh trĭ tơpôl, pơlei pơla tơ̆ tơring jing tơdrong kăl hloh. ‘Moi kiơ̆ ‘noh, đơ̆ng blŭng jăl jang ou truh dang ei, tơring Dă Long hlôi atŏk tơ iung đei 17 đang viên, lơ̆m ou đei 11 đảng viên hŏk đang đăi hŏk păng 5 ‘nu đang viên hŏk đang trung kâp. ‘Nou dôm đang viên sơnăm mơlôh, bơngai kon kông đei lăng jing dôm bơngai pơtăl ăn đơ̆ng rŏng lơ̆m tơ iung pơjing păng atok tơ iung đảng lơ̆m jăl jang truh ou kơnh. Ƀok Cil Ha Poh, tơbăt:“ ‘Moi kiơ̆ trong kơdră kơpal pơjao ăn ‘noh Hơnih Đảng tơring hlôi iung jang kơtang lơ̆m tơchă pơjing khul, pơjao ăn rim kơdră jang lơ̆m hơnih đảng tơring iŏk vei lăng rim chi ƀô̆, atŭm hăm rim kơdră chĕp pơgơ̆r chi ƀô̆ lăng hơlen, ăn năm hŏk păng pơtho khan tơnăp. Lăng kơjăp dôm kon pơlei đei jơhngơ̆m đon ‘lơ̆ng, jang tơnăp ‘noh dôm đe hơdruh tơdăm hlôi lĕch đơ̆ng pơm ƀô̆ đô̆i, hơdruh tơdăm tơnăp lơ̆m choh jang sa, hơdruh tơdăm jang tơnăp vang jang rim tơdrong pơgơ̆r pơting dih băl ‘mêm kơ eng teh đak … Đơ̆ng noh pơjing đei khul păng pơjing rơvơn ăn năm hŏk pơhrăm găh Đảng. Mưh hŏk đang găh Đảng, rim đang viên lơ̆m chi ƀô̆ hơnơ̆ng chă tơgŭm djru, pơtho khan vă kơ sư hlôh vao ƀlep, đei jơhngơ̆m đon ‘lơ̆ng mưh đei mơ̆t lơ̆m khul Đảng”.

Dôm đang viên sơnăm mơlôh, gơh hơgei lơ̆m tơring kon kông kơ dêh char Lâm Đồng sơkơ̆t hơdăh hơnăp jang pơm jŭk yuk trong hơlou, hơdrin kơtang lơ̆m choh jang sa păng oei sa ‘lơ̆ng. Tơdrong mă ou sơkơ̆t hơdăh, pơchoh ăn trong ƀlep, kơjăp ‘lơ̆ng lơ̆m bơ̆ jang tơ iung pơjing Đảng tơklep hăm atŏk tơ iung tơring kon kông lơ̆m chăl hrei ou. ‘Nou đei lăng jĭ tơdrong jang chinh trĭ gĭt kăl hloh, jing trong ‘lơ̆ng vă Lâm Đồng hơmet pơ ‘lơ̆ng khul jang chinh trĭ tơ̆ tơring, tơgop pơtrŭt kơtang atŏk tơ iung muk drăm-tơpôl, vei kơjăp sơđơ̆ng păng atŏk kơtang tơgoăt tơgoăl dih băl kơjăp rim hơdrĕch hơdrung lơ̆m tơring.