Lơ̆m tơdrong chơt hơ-iă grasia, Kon tơdăm ƀok pơtao ‘nao tŏk pơgơ̆r kơ teh đak Brunei păng Hơkăn xư hơvơn Thủ tươ̆ng Phạm Minh Chính păng Hơkăn ƀok tŏk ăh chơnang pơkăp, tơ̆ hơla hla kơ 2 teh đak, Tơdra hơri tơm kơ teh đak Việt Nam păng Brunei hlôi đei pơtơm. Đơ̆ng rŏng kơ noh, Kon tơdăm ƀok pơtao ‘nao tŏk pơgơ̆r kơ Brunei hơvơn Thủ tươ̆ng Phạm Minh Chính năm rôp ti hăm khul linh đei pơtruh pơm lêh xơng drơ̆ng. Đơ̆ng rŏng kơ lêh xơng, Thủ tươ̆ng ‘măn jơ năm apong păng pơma dơnuh hăm kang ƀô̆, bơngai jang tơ̆ Anih jang tang măt păng kon pơlei Việt tơ̆ Brunei.

Lơ̆m dôm tơdrong jang lơ lơ̆m năr 11/2, Thủ tươ̆ng truh apong Hnam trưng Đăi hŏk Kuôk ya Brunei; pơma đam hăm ƀok pơtao, Hơkăn pơtao păng dôm bơngai oei jang lơ̆m Hnam pơtao; pơma đam hăm Ƀok pơtao, bơ̆ng pang lêh kĭ pơkăp lơ hla bar pơm jang hadoi; pơma đam hăm minh ƀar anih jang mŭk drăm pran găh unh hơyuh kơ teh đak Brunei... ‘Nâu jing ‘măng năm tơmang mă blŭng đơ̆ng Thủ tươ̆ng Phạm Minh Chính truh teh đak Brunei hăm kơchư̆k jang ‘nao vă pơtoi tơlĕch trong jang tơbôl drơ̆ng minh mă Hop akŏm Đảng ‘măng mă 13 hlôi tơlĕch. Noh jing tơdrong kăl mă blŭng vă hơtŏk tơbôl hăm dôm teh đak tơjê̆ păng ASEAN. ‘Nâu adoi jing ‘măng năm tơmang mă blŭng đơ̆ng bơngai jang Kơpal kơ teh đak Việt Nam truh teh đak Brunei đơ̆ng rŏng jê̆ 16 xơnăm.