Đei tơlĕch jang kiơ̆ đơ̆ng năr 7/3, tơdrong jang pơting dih băl jang pran kơtang kơkuh chơt hơ iă 120 sơnăm Năr pơjing dêh char Dak Lăk hăm hơnăn “Jơhngơ̆m đon hơpơi ‘meh vă tơ iung pơjing dêh char Dak Lăk pơdrŏng ‘lơ̆ng liĕm, gơ̆h hơgei, oei sa ‘lơ̆ng rŏ” hlôi iŏk đei jơnei hơ iă. Rim hơnih bơ̆ jang, tơring tơrang lơ̆m dêh char Dak Lăk hlôi tơlĕch lơ tơdrong jang hơ iă, jơnei, đơ̆ng noh đei ƀôh lơ tơdrong jang, bơngai jang ‘lơ̆ng nhen: Kŏng ang dêh char Dak Lăk hlôi jang keh đang 1.200 tơdrong jang hnam oei tơgŭm ăn ŭnh hnam dơnuh, tơnap tap găh hnam oei, ŭnh hnam đei iŏk yua ăn teh đak, bơngai kon kông lơ̆m dêh char; Hơnih jang Mặt trận Tổ quốc Việt Nam dêh char tơlĕch jang kiơ̆ tơ iung pơjing 300 pơbŭng hnam tơgoăt tơgoăl ăn rim ŭnh hnam dơnuh; Hơnih vei lăng kon pơlei apŭng Krông Pach tơlĕch jang trong jang “Hơrih sa lơ̆m jơhngơ̆m đon kon pơlei”; Hơnih vei lăng kon pơlei kơ pơlei tơm Buôn Ma Thuột hăm rim tơdrong jang cham pơkao ‘lơ̆ng Phan Huy Chú, rup man tơbăt Mậu Thân, cham pơkao Nguyễn Tất Thành.