Lữ đoàn Đặc công bộ 198 oei tơ̆ tơring Hoà Đông, apŭng Krông Pach, dêh char Dak Lăk.  Dôm sơnăm ou ki, atŭm hăm jang ‘lơ̆ng tơdrong jang chinh trĭ-khul linh, Lữ đoàn oei iung jang ‘lơ̆ng bơ̆ jang pơrô̆ pơrôp. Đơ̆ng sơnăm 2021 truh dang ei, hơnih ou hlôi ming man đei 13 pơbŭng hnam bôl boăl, 14 pơbŭng hnam ‘mêm mơnat, 9 pơbŭng hnam Tơgoăt tơgoăl păng ƀar hnam trương pôk ăn khul kơdră păng kon pơlei lơ̆m tơring mă hơnih oei, hăm akŏp kon jên jang truh 5 ti 610 triu hlak jên. ‘Ngoăih kơ ‘noh hơnih oei tơgŭm ăn hloh 10 tân phe ăn kon pơlei; mơjĭt rơbou năr jang ming hơmet trong nơnăm pơlei pơla, hơboong thoong đak, chă kech yoă, phĕ plei ‘long pơtăm ăn kon pơlei; pơgơ̆r lơ ‘măng năm khăm, ƀơk pơgang ăn hloh 7.000 ‘nu kon pơlei. Dôm tơdrong jang ‘lơ̆ng đơ̆ng Lữ đoàn Đặc công bộ 198 oei tơ̆ dêh char Dak Lăk hlôi tơgop atum hăm tơring jang ‘lơ̆ng bơ̆ jang vei lăng năng tông tơdrong hơrih sa tơpôl, mă oei pơtho tơbăt dôm tơdrong joăt joe kĕch mang ăn jơhnơr mơlôh, pơm hơtŏk jơhngơ̆m đon hưch hanh hơmanh bơnê kơ teh đak, hơmet pơ ‘lơ̆ng tơgoăt tơgoăl pôm nơ̆r ƀơ̆r đon ƀô̆ đô̆i kon pơlei.