Pơma ăh 'măng tơjrâ̆m, Phŏ Kơdră teh đak bơ̆n yă Võ Thị Ánh Xuân ră hơdăh, Việt Nam hơnơ̆ng lăng tơgĭt tơdrong hơmet pơ-'lơ̆ng hơtŏk tơbôl hơtŏ hơnơ̆ng, jang hadoi, atŭm pơyua hăm dôm teh đak, rim anih jang apŭng plenh teh, lơ̆m noh đei rim teh đak, rim anih jang apŭng plenh teh mă rim Kơdră jang tang măt, đe Kơdră tang măt kơ rim anih jang apŭng plenh teh pơm jang. Ƀơ̆t 'măng âu, tang măt ăn Khul kơpal teh đak păng kon pơlei Việt Nam, Phŏ Kơdră teh đak pơtruh nơ̆r hmach bơnê kăp gĭt hăm Khul kơpal teh đak păng kon pơlei teh đak, rim anih jang apŭng plenh teh hlôi tơgŭm, jang hadoi ăn Việt Nam lơ̆m khei năr âu ki. Atŭm hăm noh hơpơi 'moih pơtoi hơtŏk jang tơbôl hăm rim teh đak, rim anih jang apŭng plenh teh gơh kơjăp hloh, đei jơnei lơ̆m tôm tơdrong jang. Tang măt ăn đe drăkăn jang tang măt, kơdră anih jang tang măt teh đak đe tơ̆  Việt Nam, yă Samina Naz, Kơdră jang tang măt ăn teh đak Bangladesh tơ̆ Việt Nam ăn tơbăt, pơjao xơnong ăn đe drăkăn păng đe hơ-ioh drăkăn jing xơnong jang atŭm. 'Năr đe Drăkăn Apŭng plenh teh jing trong hiôk vă rim teh đak vih hơlen lăng dơ̆ng dôm pơkăp âu, adoi nhen dôm tơdrong jang đei jơnei, tơdrong tơnap tap đei ƀôh tơ̆ anăp.