Hlŏh 35 sơnăm pơjing, adrin jang tŏk anih jang hlôi jing 1 anih tơchĕng hơlen khoa hŏk păng kơmăy kơmŏk ƀơm truh lơ tơdrong jang găh nhiệt đới, đei bưng ai tih tơ̆ Việt Nam, Liên bang Nga păng apŭng plenh tĕh. Tơdrong tơchĕng hơlen đei đơ̆ng Anih jang vang tơgop gĭt kăl ăn tơdrong atŏk tơiung khoa hŏk, kơmăy kơmŏk pơma atŭm, khoa hŏk, kơmăy kơmŏk ki thuơ̆t khul linh pơma adrô̆, pơvih đei yoa ‘lơ̆ng ăn tơdrong jang khul linh, vei sơđơ̆ng tĕh đak păng jang atŏk tơiung mŭk drăm, tơpôl kơ tĕh đak, pơm lăp hăm tơdrong đei yoa ăn Việt Nam păng Liên Bang Nga.

Pơma tơ̆ jơ pơm lêh, tang măt ăn kơdră chĕp kơ̆l tĕh đak, Phŏ Kơdră tĕh đak Võ Thị Ánh Xuân chơt hơiă hăm dôm tơdrong jơnei ‘lơ̆ng mă Anih jang Nhiệt đới Việt - Nga hlôi iŏk đei lơ̆m 35 sơnăm âu ki, hơpơi ‘mĕh păng lui, Anih jang Nhiệt đới Việt – Nga hơnơ̆ng pơm hơtŏk tơdrong tơguăt 1 ƀơ̆r đon, jang hơdoi păng dôm tơdrong jơnei hlôi iŏk đei, pơm hơtŏk tơdrong chĕp kơ̆l pơgơ̆r, kơsư̆k tơblăh đơ̆ng anih jang đảng păng tơdrong vei lăng, chĕp kơ̆l pơgơ̆r đơ̆ng khul kăn ƀô̆; kơchăng roi tơƀôh, tơlĕch trong jang mă rơđăh vă pơm hơtŏk, pơih xă tơdrong jang hơdoi, hơtŏk tơdrong đei yoa đơ̆ng bơ̆ jang, pơvih pơvăn ăn khul linh, vei sơđơ̆ng tĕh đak păng jang atŏk tơiung mŭk drăm, tơpôl kơ 2 păh.