Hăm jơhngâm đon chơt hơiă ‘nă hal kơ Pơyan Noel sơnăm 2024, kơsơ̆ brei (22/12), tang măt ăn kơdră chĕp kơ̆l Đảng păng teh đak, Phó Thủ tướng Nguyễn Hòa Bình năm ngôi, pơtruh nơ̆r hơiă Pơyan Noel păng sơnăm ‘nao 2025 tơ̆ Hnam khop tơm Hà Nội, Anih vei lăng tơdrong lui Tin Lành Việt Nam (găh Tu) păng Anih tơguăt tơdrong lui Công giáo Việt Nam.

Năm ngôi păng hơiă hăm pơyan Noel tơ̆ Anih tơguăt tơdrong lui Công giáo Việt Nam, Phó Thủ tướng Nguyễn Hòa Bình akhan, khei ‘năr âu ki Anih tơguăt tơdrong lui Công giáo Việt Nam đei lơ tơdrong tơgop tih lơ̆m tơdrongpơjing trong tơguăt đĭ đăng hơdrĕch hơdrung, ưh lăp mât 1 ƀơ̆r đon lơ̆m tơpôl bơngai lui Công giáo đĕch mă oei tơguăt bơngai lui păng ưh tam mă lui hai, tơguăt đơ̆ng Việt Nam hăm apŭng plenh teh.

Tơdrong ‘nâu hlôi hơmet kơjăp tơdrong tơguăt đĭ đăng hơdrĕch hơdrung – ƀai hŏk tôch kăp gĭt găh jơ hngâm pran kơ Việt Nam. Jơ hngâm đon tơguăt đĭ đăng hơdrĕch hơdrung hlôi pơm ăn teh đak, hơdrĕch hơdrung bơ̆n roi pran păng jang tŏk lơ̆m chăl ‘nao, chăl pơdrŏng hơnŭk hơnoa. Phó Thủ tướng Nguyễn Hòa Bình pơma hơdăh, lơ̆m tơdrong jơnei atŭm ‘nŏh đei lơ tơdrong tơgop đơ̆ng tơpôl bơngai lui Công giáo, mă loi jŏ đơ̆ng Anih tơguăt tơdrong lui Công giáo Việt Nam.