Tơdrong hop akŏm kơyuơ Jơnŭm jang Tĕch pơdro păng Kŏng ngĭp Việt Nam (VCCI) păng Anih jang Tĕch pơdro păng Kŏng ngĭp Nhâ̆t atŭm pơgơ̆r. Tơdrong hop akŏm jing kăp gĭt vă tơbăt 50 xơnăm iung jang tơbôl Việt Nam – Nhâ̆t, pơih blŭng ăn dôm tơdrong jang hadoi anih jang mŭk drăm 2 teh đak kơyuơ VCCI jang atŭm hăm dôm anih jang hadoi kơ teh đak Nhâ̆t gô pơgơ̆r lơ̆m xơnăm âu.

Pơma ăh hop akŏm, Phŏ Thủ tướng Trần Lưu Quang xơkơ̆t, 2 teh đak adoi oei đei lơ mŭk drăm jang hadoi, tơgŭm dih băl, hơyak truh 50 xơnăm iung jang tơbôl, 2 păh gô atŭm jơhngơ̆m vă tơgop hơtŏk tơbôl kơ 2 teh đak gơh đei jơnei tih tên hloh lơ̆m tơdrong jang mŭk drăm. Khei năr truh, 2 teh đak Việt Nam- Nhâ̆t kăl pơtoi hơtŏk pran jang hadoi axong jang, mă kăl noh lơ̆m tơdrong jang kŏng ngĭp dơnơm.