Kiơ̆ tơlĕch jang đơ̆ng Anih tơm Choh jang xa păng Hơtŏk tơring pơxĕl, truh blŭng khei 3 kơnh, Tơdrong ming man pơnơ̆ đak 4.400 tih Krông Pách thươ̆ng tơlĕch jang tơ̆ dêh char Đăk Lăk gô bơ̆t thong mong đak. Tơdrong ming man vă iŏk đak ruih ăn pơhlom 15.000 ha teh choh jang xa tơ̆ dôm apŭng găh hlĕch dêh char Đăk Lăk. Mă lei, Truh khei năr âu, tơdrong pơkăp hrŭ 'mong iŏk teh tơmăn vă ming man adoi tam mă keh đang, oei 488 unh hnam kon pơlei oei tơ̆ anih kăl iŏk teh ming man.  Dang ei, Anih jang vei lăng kon pơlei apŭng M'Drak, dêh char Đăk Lăk tŏk bŏk tenh kuăng pơkăl jăk erih tơ̆ nai hăm kon pơlei. Tơdrong pơkăl jăk erih tơ̆ nai hăm 488 unh hnam kon pơlei đei tơlĕch kiơ̆ pơkăp jang đơ̆ng Anih jang vei lăng kon pơlei apŭng M'Drak vă iŏk teh ming man pơnơ̆ đak Krông Pách thươ̆ng – tơdrong ming man 4400 tih hlj hlôi jang adar pơtêng hăm tơlĕch jang lơ xơnăm kơ âu kơyuơ oei đei lơ unh hnam tam mă lăp đon hăm tơdrong hrŭ 'mong, tơgŭm anih oei xa 'nao. Tơdrong kăl kơ anih oei xa 'nao tam mă keh đang păng axong pơm jang tam mă đei axong tôm noh jing tơdrong tơm pơm ăn kon pơlei ưh lăp đon. Tơdrong hrŭ 'mong teh iŏk ming man, lơ̆m kơsô̆ 742 unh hnam kon pơlei lơ̆m  tơring pơm jang, truh dang ei, pơtơm đei 254 unh hnam jăl oei tơ̆ anih oei 'nao. Tôm unh hnam kon pơlei athei jăk oei truh anih 'nao kơsô̆ 2, lơ̆m xăh Cư Bông, apŭng Ea Kar.