Pơlei tơm đei 22 tơring, apŭng, pơlei tơm Thủ Đức păng 281/312 phương ăh, thĭ trâ̆n chih akŏm păng tơbang tơdrong jang hnưr erih pơm jang Đảng ƀô̆, hnưr erih juăt jue iung tơjră kơ kăch mạng jăl xơnăm 1930-1975 păng đơ̆ng xơnăm 1975 truh dang ei. Mă thoi noh, lơ̆m tơdrong pơm kiơ̆ Tơchơ̆t kơsô̆ 20 kơ Jơnŭm jang Ƀĭ thư Trung ương Đảng tơ̆ pơlei tơm HCM duh oei lơ tơdrong tơjruh nhen: Tơdrong axong bơngai jang, minh păh noh kơyuơ tơdrong jang tơroi tơbăt ưh đei ƀiên chê̆ ăn tơdrong jang tơroi găh hnưr erih Đảng. Pơma ăh hop akŏm, ƀok Nguyễn Hồ Hải, Phŏ Ƀĭ thư anih jang Đảng pơlei tơm pơkăl: Khei năr truh, rim anih jang kăl pơtoi iŏk jang păng hơmet dôm tơdrong tơnap tap lơ̆m khei năr dang ei. Pơm thoi yơ vă tơdrong jang chih akŏm tơroi tơbăt, pơtho găh hnưr erih kơ Đảng roi năr roi tơnăp hloh, trŏ hăm rim bơngai, mă hăt noh đe mơlôh. Đei dôm tơdrong pơgơ̆r vă kon pơlei hlôh vao trŏ tơdrong tơpă kơ hnưr erih păng kơ-'nôh pơtoi pơm jang tơdrong jang âu.