Thương tươ̆ng Lương Tam Quang,  Thư̆ trương Anih tơm Kŏng ang Việt Nam păng Phŏ Kơdră Anih jang Kanh sat teh đak Nhâ̆t Ogata Yoshimi atŭm pơgơ̆r Pơma đam. Thư̆ trương Lương Tam Quang ră hơdăh, Pơma đam 'măng mă âu jing 'măng vă 2 anih jang atŭm xơkơ̆t tơdrong jang đei jơnei; vang glơng, jang hadoi, pơma đam tơpăt jue găh dôm tơdrong mă 2 păh atŭm tơrĕk truh; drơ̆ng nơ̆r găh trong jang, tơdrong jang hadoi kăp gĭt, đei jơnei hloh dơ̆ng, xek tơlang tơnăp dôm tơdrong pơm glăi kơ 2 teh đak lơ̆m pơkăp jang 'nao, pơm trŏ tơdrong pơkăp vei xơđơ̆ng tơpôl, tang găn păng tơjră pơm yoch glăi; tơgop hơtŏk đon lui kơ 2 păh, kơyuơ tơdrong pơyua atŭm kơ 2 teh đak, atŭm hăm noh, tơgop vei xơđơ̆ng rơngei hiôk hian păng hơtŏk tơ-iung lơ̆m tơring. Ăh jơ Pơma đam, hăm pơkăp tơbôl, lui ngeh dih băl, 2 păh hlôi drơ̆ng nơ̆r kăl pơtoi hơtŏk pran tơdrong jang hadoi đei jơnei kơjăp hloh dơ̆ng lơ̆m tơdrong jang tang găn păng tơjră pơm yoch glăi, vei xơđơ̆ng tơdrong erih, jơnap ăn kon pơlei 2 teh đak Việt Nam – Nhâ̆t.