Tơ̆ hơnăp tơdrong ‘nâu khŭl linh kơ pal păng khŭl kơdră rim tơring tŏk bŏk hơtŏk loi dơ̆ng tơdrong jang tang găn ŭnh sa bri. Kiơ̆ kơ Anih vei lăng bri ‘long dêh char Kon Tum, dang ei đei 7/10 apŭng, pơlei tơm lơ̆m dêh char kơ sô̆ tơroi tơbăt hơdrol ŭnh sa bri tŏk bŏk tơ̆ kơ sô̆ V, kơ sô̆ tôch kơ krê hơmơt.

Lơ̆m akŏp kơ sô̆ hloh 610.600hek tar bri dang ei đei kơ dêh char, teh bri đei băt hơdăh ƀônh kơ đei ƀôh ŭnh sa ‘noh hloh 227.000hek tar. Hơdrô̆ 4 apŭng păh Pơmơ̆t ‘noh: Ngọc Hồi, Đăk Tô, Sa Thầy păng Ia H'Drai đei hloh 96.100hek tar bri hơmơt kơ ŭnh sa tôch kơ dêh. Ƀok Nguyễn Văn Nam, Phŏ Kơdră Anih jang vei lăng bri ‘long dêh char Kon Tum tơbăt, khŭl linh kơpal păng khŭl kơdră tơring tŏk bŏk hơtŏk loi dơ̆ng tơdrong jang tang găn ŭnh sa bri.