Ƀlep ƀât tơbăt 42 sơnăm năr Thây kô pơtho Việt Nam, pơgê hei Quốc hội pơma nuh tơ̆ hnam hôp găh Luơ̆t Thây kô pơtho. Adrol kơ ‘nŏh, lơ̆m đơt 1 Quốc hội pơma nuh tơ̆ grŭp, 1,2 ‘nu bơngai tang măt athei luơ̆t chih hơdăh dôm tơdrong tơgŭm hăm khul thây kô mă tơgăl hăm dôm tơdrong plang pơyơ̆r đơ̆ng thây kô; atŭm hăm ‘nŏh đei trong pơlung ăn thây kô bơ̆ jang tơ̆ tơring kon kông păng groi kông, tơring pơmat tat dêh hlŏh…

Bơngai tang măt tơrek truh tơdrong chih tơlĕch nơ̆r hơgăt hăm thây kô pơtho tơ̆ hnam trưng đơ̆ng kon pơlei pơjing; thây kô đei tôm tơdrong hơgăt kăl hăm tơdrong jang lăp hăm tơdrong pơtho pơhrăm păng pơm ‘lơ̆ng hăm rim jăl hŏk păng tơdrong đei hŏk pơhrăm. Dôm bơngai tang măt pơma nuh găh Luơ̆t thây kô pơtho vă pơjing trong jang, tơdrong tơgŭm ăn tơdrong pơtho pơhrăm kon bơngai. Tơ̆ kơsơ̆, Quốc hội mơ̆ng Hla ar chih tơroi, Hơlen năng Luơ̆t oei chih hơmet ming 1,2 tơdrong lơ̆m Luơ̆t dăr lăng đơ̆ng Quốc hội păng Jơnŭm pơgơ̆r kon pơlei păng pơma nuh tơ̆ hnam hôp găh Trong tơmât jên jang pơm trong gre treng kơdâu hrĕnh Bắc – Nam; Hơmet ming trong tơmât jên jang man Cham gre păr apŭng plenh teh Long Thành.