Kiơ̆ kơtơ̆ng ang tơ̆ hop akŏm jăl jang 2021-2025, rim dêh char Tây Nguyên đei Trung ương pơjao hloh 11.700 ti hlak jên vă jang 3 Tơdrong jang tơm teh đak. Kon jên au tơmơ̆t 11,73% akŏp kon jên Trung ương tơmơ̆t jang ăn 3 tơdrong jang tơm teh đak lơ̆m teh đak.

Hơdrô̆ sơnăm 2022, Trung ương ƀơk ăn hloh 3.878 ti hlak jên păng rim dêh char Tây Nguyên hơmet ăn hloh 870 ti hlak jên kon jên dêh char vă jang. Truh năr 31/12/2022, rim dêh char lơ̆m tơring ‘nao tơlĕch kon jên 34% kon jên Trung ương pơjao (tŏ sĕt hloh pơtêng hăm jô̆ hơtŏ lơ̆m teh đak). Khei 1/2023, hlôi đei 3 lơ̆m 5 dêh char ‘noh Kon Tum, Lâm Đồng, Đăk Nông klăh asong tôm kon jên jang kơ sơnăm.

Tơroi tơbăt hăm Kơ iĕng Thủ tướng găh jang kiơ̆ rim tơdrong jang, rim dêh char Tây Nguyên jei tơbăt lơ tơdrong tơhlăk tơhlĭn, nhen ư̆h gan đei hla bơar pơtho tơbăt đơ̆ng Trung ương; mĭnh ƀar nơ̆r tơbăt, tơchơ̆t hlôi đei pơjing mă lei trong hlôh vao tim mă lei lăi dăh mă tim mă ƀlep hăm tơdrong jang au tơ̆ tơring Tây Nguyên păng kiơ̆ kơ tơring. Yă Nguyễn Thị Thanh Lịch-Kơ iĕng Kơdră chĕp pơgơ̆r Hơnih vei lăng kon pơlei dêh char Gia Lai tơbăt:“Hrei au, lơ̆m tơ iung pơjing vă lei lăi rim nơ̆r pơtho tơbăt đơ̆ng Khul kơdră Teh đak, hơnih tơm păng tơring oei tơƀơ̆p tơnap tap. Mă ƀar ‘noh, rim trong pơkăp tơ iung pơjing, đei mĭnh ƀar trong pơkăp tim mă gan lăp hăm rim tơdrong rơvơn mŭk drăm-tơpôl tơ̆ Gia Lai. Tơdrong mă pêng ‘nŏh tơlĕch jang akŏp pơ đĭ kon jên jang au to, trong pơkăp, nơ̆r pơtho tơbăt vă jang kiơ̆ đei jơnei, đei jing hơyak pran ăn atŏk tơ iung mŭk drăm-tơpôl tŏk bŏk oei tơhlăk tơhlĭn".

Đơ̆ng đei ƀôh tơhlăk tơhlĭn tơ̆ Tây Nguyên, kơdră chĕp pơgơ̆r rim dêh char hlôi tơlĕch trong jang vă khul kơdră teh đak hơlen. Ƀok Nguyễn Hữu Tháp-Kơ iĕng Kơdră chĕp pơgơ̆r Hơnih jang vei lăng kon pơlei dêh char Kon Tum pơma:“Dôm nơ̆r apĭnh athei tơ̆ au ‘noh hrôih pơjing tơchơt găh hơgrop kon jên tơmơ̆t jang lơ̆m tơring. Mă ƀar ‘nŏh hrôih pơjing đei tơdrong pơkăp ăn jang dôm yơ, pơtho tơbăt, lơ̆m au đei teh oei, teh chŏh jang sa ăn kon pơlei, mă kăl tơring atăih yăih. Lơm khei năr gôchang nơ̆r pơtho tơbăt hơdăh hloh, dêh char oei akŏm tơlĕch jang kiơ̆ hơnơ̆ng đơ̆ng ki vă jang keh đang trong pơprŏ jang păng akŏm tơlĕch kon jên iung jang ƀlep hăm tơdrong pơkăp tơlech kon jên jang".

Lăp đơ̆ng rŏng mơ̆ng rim tơring tơbăt, athei, Kơ iĕng Thủ tướng Teh đak Trần Lưu Quang tơgoăt iŏk păng hôn bơnê mĭnh ƀar tơdrong jang mă rim dêh char Tây Nguyên hlôi jang đang, pơjing hơyak pran vă iung jang rim tơdrong jang uơ oei. Kơ iĕng Thủ tướng athei rim tơring hrôih jang keh đang tơdrong pơjao jên jang, iok yua kon jên jang mă trŏ ƀlep hăm tơdrong jang; athei rim hơnih tơm, hơnih bơ̆ jang Trung ương iung jang hloi dăr lăng, pơm pơkeh dôm tơdrong tơchơ̆t oei tim mă tôm tong. Găh păh rim tơring, Kơ iĕng Thủ tướng athei kăl hơnơ̆ng atŏk kơtang iung jang dôm tơdrong jang tŏk bŏk oei jang; atŏk kơtang jang hơdoi ƀar păh rim tơring păng hơnih bơ̆ jang Trung ương păng bơ̆ jang iung jang hơdoi ƀar păh lơ̆m rim hơnih jang kơ tơring lơ̆m tơlĕch jang kiơ̆:“Ĭnh athei, tơ̆ tơring ƀok Kơdră chĕp pơgơ̆r Hơnih vei lăng kon pơlei dêh char dăh mă Kơ iĕng Kơdră chĕp pơgơ̆r hơnih vei lăng kon pơlei dêh char vei lăng rim tơdrong vă jang gô jing “bơngai pơjao jang”, tơ oei tŏk bŏk rim hơnih bơ̆ jang vă hơlen nơ̆r tơgop đơ̆ng noh hơmet pơ ‘lơ̆ng. Hăm hơnăp jang Kơ iĕng Thủ tướng Teh đak, Kơdră Hơnih chĕp pơgơ̆r Trung ương, ĭnh gô jing bơngai pơjao tơdrong jang atŭm hăm rim tơring păng rim kơdră kơpal, kơ iĕng kơdră kơpal tim mă lăp đon, vă kơ bơ̆n pơm jang. Hơpơi đĭ đăng bơn kăl hŏk pơhrăm dih băl dôm tơdrong jang ‘lơ̆ng hơ iă, đei tơrring tơlĕch jên jang tôch kơ koăng, bơ̆jang ‘lơ̆ng. Kơna bơ̆n hơ leng lăng đe sư bơ̆ jang lơ liơ ‘nŏh bơ̆n kiơ̆ yok vă bơ̆n jang keh đang tơdrong jang đei pơjao".

Kơ iĕng Thủ tướng Trần Lưu Quang jei akhan, khei năr vă jang keh đang rim Tơdrong jang tơm Teh đak pă đei đunh bơih, rim dêh char tơring Tây Nguyên kăl akŏm tơlĕch jang păng kăl hơmet pơ ‘lơ̆ng dôm tơdrong jang tim mă ‘lơ̆ng; tơmơ̆t dơ̆ng dôm tơdrong tim mă hơ iă, tim mă đang păng kăl jang keh đang lơ̆m jăl I/2023 hloi. Hơtuch hop akŏm, Kơ iĕng Thủ tướng Trần Lưu Quang athei lơ̆m khei năr kơnh, Hơnih bơ̆ jang ăn Khul kơdră chĕp pơgơ̆r Teh đak akŏm, jô̆ hơlen, pơchoh trong ăn Kơ iĕng Thủ tướng pơjing hla bơar tơchơ̆t pơrô̆ rim hơnih bơ̆ jang, tơring jang kiơ̆ hloi rim tơdrong jang hơdăh, đei hloi hla bơar tơroi tơbăt ăn Khŭl kơdră chĕp pơgơ̆r Teh đak.