Pơgê năr 19/5, Hơnih Đảng dêh char Kon Tum pơgơ̆r Hop akŏm pơtôch 10 sơnăm jang kiơ̆ Nơ̆r athei jang kiơ̆ kơsô̆ 05 kơ Hơnih tơm Chinh trĭ jăl XII “ găh atok kơtang, hŏk pơhrăm jơhngơ̆m đon ‘lơ̆ng, trong bơ̆ jang hơgei kơ Ƀok Hô”. Hloh 10 sơnăm tơlĕch jang kiơ̆, dêh char hlôi tơlĕch lơ trong jang tơklep hăm dôm tơdrong yan ou, tơdrong bơ̆ jang kiơ̆ jăl sơnăm. Rim hơnih bơ̆ jang hlôi pơjing đei 2.760 tơdrong jang hơ iă, trong jang ‘lơ̆ng, lang să kơtang tơdrong hŏk pơhrăm păng pơm kiơ̆ trong jang hơ iă kơ Ƀok Hô lơ̆m hơnih Đảng păng lơ̆m kon pơlei pơla. Tơ̆ Hop akŏm, Hơnih Đảng dêh char Kon Tum pôk pơ ư, pôk ăn kơthơ bơnê đơ̆ng Ƀĭ thư Đảng dêh char Kon Tum păng hla bơar hôn bơnê đơ̆ng Kơdră chĕp pơgơ̆r Hơnih vei lăng kon pơlei dêh char ăn 30 khul, 46 ‘nu bơngai jang ‘lơ̆ng hloh. ‘Nou jing jơ ‘năr vă lơ̆m dêh char hơnơ̆ng sơkơ̆t hơdăh hơnăp jang, tơdrong kăl kơ tơdrong hŏk pơhrăm păng pơm kiơ̆ Ƀok Hô lơ̆m bơ̆ jang tơ iung pơjing Đảng păng atŏk tơ iung dêh char.

Kŭm lơ̆m pơgê ‘năr 19/5, Khŭl chĕp kơ̆l pơgơ̆r anih jang Đoan dêh char Lâm Đồng pơgơ̆r Hop akŏm pơtôch 10 sơnăm jang kiơ̆ Tơdrong tơchơ̆t kơsô̆ 05 đơ̆ng Anih tơm Chĭnh trĭ jăl XII, hơdai hăm pôk pơ Hơdruh tơdăm hơgei pơm kiơ̆ nơ̆r ƀok Hồ sơnăm 2025. Dôm sơnăm âu ki, lơ̆m dêh char Lâm Đồng hlôi tơlĕch jang đei yua lơ tơdrong jang hơdruh tơdăm rim tơring hăm akŏm kơjă hloh 75 ti hlak jên; lơ̆m noh đei 45 tơdrong jang tơ̆ dêh char, 446 tơdrong jang tơ̆ apŭng păng hloh 8.400 tơdrong jang tơ̆ tơring. Lâm Đồng oei pơvei 160 tơdrong jang grŭp jang, khŭl vei lăng cham char, sơng đei hloh 4.000 đoàn viên, hơdruh tơdăm vang jang. Lơ̆m 10 sơnăm, Anih jang Đoàn dêh char hlôi pôk pơ ư 380 khŭl grŭp, bơngai jang hơgei păng tơmơ̆t hloh 5.800 ‘nu đoàn viên hơgei mơ̆t Đảng Cộng sản Việt Nam.

Pơgê năr 19/5, Hơnih vei lăng kon pơlei dêh char Dak Nông pơgơ̆r Pơm lêh tơlĕch jang “Têt pơtăm ‘long ling lang ƀok hơdơ̆r hôn bơnê kơ Ƀok Hô” păng tơlĕch trong jang pơtăm ‘long bri sơnăm 2025. Tơ̆ jơ pơm lêh, kơdră chĕp pơgơ̆r dêh char krao hơvơn đĭ đăng hơnih bơ̆ jang, khul ƀô̆ đô̆i kŏng ang, tơring păng kon pơlei hơdrin kơtang vang jang kiơ̆ nơ̆r pơtho khan đơ̆ng Ƀok Hô: “Kơ yuơ đei iŏk yoa mơjĭt sơnăm pơtăm ‘long, kơ yuơ đei iŏk yua kơ hreng sơnăm pơjing kon bơngai”. Lăp đơ̆ng rŏng pơm lêh tơlĕch jang, rim bơngai tang măt hlôi pơtăm 1.300 dơnơm ‘long hơngo tơ̆ bro vat găh Tơdrong vă jang kih thuơ̆t Đak Nut, pơlei tơm Gia Nghĩa. Jei lơ̆m jơ ‘năr ou, rim tơring lơ̆m dêh char jei vang iung pơgơ̆r pơm lêh tơlĕch jang păng iung jang pơtăm ‘long. Sơnăm ou, dêh char Dak Nông hơdrin atŏk tơ iung đei hloh 1.700 hektar bri.