Tơ̆ pơma dơnuh lơ̆m khul kơ ‘Măng hop akŏm mă 9, Kuô̆k hô̆i jăl XV, Thủ tướng Teh đak Phạm Minh Chính pơma hơdăh: Lơ̆m khei năr đei lơ tơdrong long lơ̆m plei teh, Việt nam tơlĕch ăn trong jang tŏk mŭk drăm hloh 8% sơnăm 2025 păng lăng truh tŏk ƀar kơsô̆ lơ̆m hơnô̆ hơnăp kơnh, hơdrin đei jing teh đak atŏk tơ iung, jang sa iŏk đei lơ lơ̆m sơnăm 2045. Vă jang kiơ̆ kơjăp ‘lơ̆ng trong tơlĕch jang ‘noh, Thủ tướng akhan, kăl akŏm lơ̆m pêng tơdrong: trong bơ̆ jang, trong hnam păng khul jang. Lơ̆m ou, tơlĕch lơ̆m trong bơ̆ jang ‘noh jing “hơnih tơhlăk kơ rim hơnih tơhlăk” mă lei jei jing jơhngơ̆m pran ăn atŏk tơ iung. Thủ tướng pơma hơdăh, tơdrong jang kiơ̆ Tơdrong tơchơ̆t 66, kơrŭn đĭ ai hơmet pơ ‘lơ̆ng rim tơdrong găn ga trong bơ̆ jang lơ̆m sơnăm 2025 vă pơm ăn trong bơ̆ jang jing tơdrong rơvơn kĕ pơjei. Thủ tướng krao hơvơn Kuô̆k hô̆i hơnơ̆ng tơgŭm djru kơtang bơ̆ jang hơmet ming trong bơ̆ jang, tơdrong tơchơ̆t pơjing đei hơyak pran kơtang vă teh đak atŏk tơ iung tĕnh koăng, kơjăp ‘lơ̆ng lơ̆m khei năr kơnh.