Iung pơma tơ̆ âu, Thủ tướng Phạm Minh Chính pơma hơdăh, Tơdrong tơchơ̆t Hop akŏm ‘măng mă XIII kơ Đảng tơroi rơđăh, hơtŏk tơiung teh đak kơjăp kiơ̆ lơ̆m khoa hŏk kơmăy kơmŏk păng tơplih ‘nao hơgei. Thủ tướng akhan kăl kơ tơchĕng hơlen slogan đơ̆ng Anih jang ‘noh jĭ “akŏm đon hơgei păng păr ang tơdrong đei yua tơplih ‘nao pơcheh hơgei Việt Nam”. Đang kơ ‘noh, Thủ tướng Phạm Minh Chính năm ngôi tơ̆ Grŭp jang Kơmăy kơ mŏk - Viễn thông khŭl linh (Viettel) păng bơ̆jang găh tơdrong tơchĕng hơlen pơm tơlĕch kơmăy kơmŏk ‘nao kơ Viettel.

Tơ̆ âu, Thủ tướng athei Viettel hơnơ̆ng jang kiơ̆ ‘lơ̆ng hloh dơ̆ng trĕng lăng păng hơnăp jang đơ̆ng kơ dih vă bơ̆jang kiơ̆ dôm hơnăp jang đei pơjao. Lơ̆m noh athei akŏm pơ jing păng hơtŏk tơiung, ‘noh jĭ tơdrong tơm pơjing grŭp jang hơdai kơmăy kơmŏk khŭl linh hăm kơmăy ‘nao; pơjing, hơtŏk tơiung tơdrong jang kơmăy kơmŏk pơm tơlĕch tơmam kon pơlei yua, tơgop bơ̆jang kiơ̆ hơnăp jang hơnhăk Việt Nam jing 1 teh đak kơmăy kơmŏk hơtŏk tơiung; ƀơ̆t măt pơyua ăn đei iŏk tơplih kơ sô̆ teh đak hăm dôm tơdrong tơm pơjing Khŭl kơdră teh đak kơ sô̆, tơpôl kơ sô̆; vei hơnăp jang chông ba tơdrong jang tơplih kơ sô̆; pơjing hla ar chih răk teh đak; hơtŏk loi dơ̆ng tơdrong viễn thông, sơđơ̆ng mạng.