Drâm kơsơ̆ brei (22/12), lơ̆m ‘măng năm bơ̆ jang tơ̆ dêh char Lào Cai, Thủ tướng Phạm Minh Chính păng khul jang hlôi bơ̆ jang hăm Khul kơdră chĕp kơ̆l dêh char Lào Cai, hơlen năng rim tơdrong jang đei mưh atŏk tơiung mŭk drăm, tơpôl sơnăm 2024 păng trong jang, tơdrong vă jang tơ̆ hơnăp kơnh. Pơma pơtôch jơ bơ̆ jang, Thủ tướng Phạm Minh Chính lăp đon hăm dôm tơdrong ‘lơ̆ng, dôm tơdrong jơnei hlôi jang đei đơ̆ng Lào Cai lơ̆m sơnăm 2024.

Găh đon tơchĕng, trong vă jang tơ̆ hơnăp kơnh, Thủ tướng athei pơjing trong pơgơ̆r jang, tơdrong vă jang mă hơdăh, tơlĕch jang mă hrơ̆ch, đei yoa ‘lơ̆ng tơdrong tơchơ̆t đơ̆ng Hop akŏm mă XIII kơ Đảng, dôm tơdrong tơchơ̆t, nơ̆r pơtho đơ̆ng Trung ương, Anih tơm Chinh trĭ, Ban Bí thư, Quốc hội, Khul kơdră teh đak, lơ̆m noh đei tơdrong tơchơ̆t kơsô̆ 11 đơ̆ng Anih tơm Chinh trĭ găh trong jang atŏk tơiung mŭk drăm, tơpôl păng vei lăng sơđơ̆ng teh đak tơ̆ tơring tŏk bŏk jăl đak krong păng tơring groi kông găh Tu; Tơdrong tơchơ̆t đơ̆ng Hop akŏm Đảng ƀô̆ dêh char; tơmât yoa, bơ̆ jang mă trŏ trong jang đơ̆ng Đảng, khôi luơ̆t teh đak păng nơ̆r pơtho, tơdrong pơgơ̆r jang đơ̆ng Khul kơdră teh đak, Thủ tướng teh đak.