Tơdrong pơkăp lêh pơtơm đei hơnăn "Việt Nam - Rơngei – Jang hadoi – Hơtŏk tơ-iung" hăm 2.400 kang ƀô̆, Khul linh Kon pơlei Việt Nam truh đơ̆ng dôm Anih linh Đăk kŏng, Anih linh vei sơlam teh păng Kuân nhak akŏm pơdah. Pơma ah jơ lêh, Thủ tướng Phạm Minh Chính ră hơdah, 'măng Pơdah tơmam so gah Khul linh vei lăng tơpôl apŭng plenh teh Việt Nam 2024 đei tơdrong kăp gĭt, pơgơ̆r trŏ ah 'măng tơbăt 80 sơnăm Năr tơ-iung pơjing Khul linh Kon pơlei Việt Nam păng 35 sơnăm Năr tôm kon pơlei vei lăng teh đak.

'Nâu jĭ tơdrong akŏm apŭng plenh teh kăp gĭt hloh hăm nơ̆r tơbang “Rơngei – Jang hadoi – Hơtŏk tơ-iung", tơgop hơtŏk jang tơbôl păng jang hadoi gah linh lơ̆m tôm tơdrong jang; kơyuơ tơdrong rơngei sơđơ̆ng, jang hadoi păng hơtŏk tơ-iung lơ̆m tơring păng lơ̆m apŭng plenh teh. Việt Nam sơkơ̆t hơdah trong jang hơtŏk tơ-iung kŏng ngĭp vei sơđơ̆ng tơpôl teh đak, kơchăng jang kiơ̆ trong 'nao păng jang hadoi lơ̆m apŭng plenh teh; hơtŏk răh tơdrong pran vă hơtŏk mŭk drăm, 'măn pơyua ăn trong jang kơ teh đak păng ăn tơdrong hơrih kăp gĭt kơ kon pơlei.