Pơgê ‘năr 16/2, tơ̆ Bến Tre, Thủ tướng Phạm Minh Chính  pơgơ̆r bơ̆jang hăm kơdră dơnơm dêh char Bến Tre vă hơlen lăng pơtôch hơtŏk tơiung mŭk drăm - tơpôl sơnăm 2022 păng pơma dơnuh trong jang, hơnăp jang sơnăm 2023; hơmet pơ ‘lơ̆ng dôm tơdrong mơmat ta, tơhlăk tơhlĭn păng hơmet ‘lơ̆ng nơ̆r apĭnh vă tơgŭm Bến Tre hơtŏk tơiung hrĕnh, kơjăp. Tơ̆ jơ bơ̆jang, Thủ tướng lui ngeh akhan, hăm trong vă jang, tơdrong jang hơtŏk tơiung trŏ ƀlep, kŭm hăm đĭ jơhngơ̆m, jang tơnăp đơ̆ng pơđĭ khŭl jang chĭnh trĭ, tơdrong vang jang ‘lơ̆ng đơ̆ng tơpôl jang mơdro sa păng kon pơlei lơ̆m dêh char, Bến Tre gô hơtŏk jơhngơ̆m đon tơgoăt tơgoăl, đon tơchĕng ‘lơ̆ng, iung dơ̆ng pơm tơ ‘ngla păng jang tŏk pran kơtang, jang đei tơdrong “ Iung jang ‘nao” vă  "Bến Tre jing dêh char hơtŏk tơiung ‘lơ̆ng kơ tơring tơmăn đak krong Cửu Long lơ̆m sơnăm 2025 păng kơ lơ̆m teh đak lơ̆m sơnăm 2030.

Găh dôm tơdrong apĭnh đơ̆ng dêh char Bến Tre kiơ̆ lơ̆m dôm nơ̆r tơgop đơ̆ng kơdră chĕp kơ̆l dôm anih tơm, anih jang Trung ương, Thủ tướng drơ̆ng nơ̆r hăm tơdrong hơmet pơ ‘lơ̆ng dôm nơ̆r apĭnh đơ̆ng dêh char, kiơ̆ lơ̆m tơdrong kăl vei sơđơ̆ng ƀlep dôm tơdrong hơgăt đơ̆ng khôi luơ̆t; pơm trong jang tơgŭm hiôk, hơvơn tôch ai dôm jên jang ăn tơdrong hơtŏk tơiung kơ dêh char.