Pơma tơ̆ hop akŏm, Thủ tướng Phạm Minh Chính pơma hơdăh athei hlôh vao kơjăp, bơ̆ jang hrơ̆ch ‘lơ̆ng, pran kơtang, đei yoa dôm tơdrong jang, trong jang kiơ̆ nơ̆r tơchơ̆t đơ̆ng Trung ương, Anih tơm Chinh trĭ, Tơdrong tơchơ̆t đơ̆ng Kuô̆k hô̆i, Khul kơdră tĕh đak; chĕp kơjăp jơhngâm, adrin tôch ai bơ̆ jang khŏm đei dôm tơdrong vă pơhnŏng jang, dôm tơdrong hơgăt, tơdrong jang atŏk tơ-iung mŭk drăm, tơpôl hlôi đei tơlĕch lơ̆m sơnăm 2023.

Lơ̆m nŏh, dôm tơdrong jang chinh trĭ gĭt kăl ‘nŏh hơtŏk tơdrong tơlĕch jên ăn dôm tơdrong jang kơ tĕh đak păng tơlĕch tơdrong tưk tơ-iung ming păng jang tŏk mŭk drăm, tơpôl, 03 tơdrong jang tơm kơ tĕh đak. Thủ tướng pơma hơdăh, dôm tơdrong jang âu tôch gĭt kăl găh mŭk drăm, chinh trĭ, tơpôl, khul linh, vei lăng sơđơ̆ng, hơmet pơ ‘lơ̆ng dôm tơdrong tơhlăk, pơjing trong jang hơdoi ‘lơ̆ng găh mŭk drăm tơpôl, chơng hơnhăk tơdrong tơmât jên jang đơ̆ng kơdih, pơih xă anih jang tŏk ‘nao, hơtŏk tơdrong jang hơdoi, vei lăng kơjăp ‘lơ̆ng mŭk drăm lơ̆m tĕh đak, sut pơđĭ pơngot, tơjur tơnuh hin, hơtŏk jơhngâm pran ăn tĕh đak, pơjing jơhngâm vă jang tŏk ming hrĕnh păng pran kơjăp.